Dınara Sádýaqasova shahmattan Álem chempıony atandy
ALMATY. 1 qarasha. QazAqparat /Erlik Erjanuly/ - 20-30 qazan kúnderi Grekııanyń Porto-Karras qalasynda shahmattan jastar arasyndaǵy Álem chempıonaty ótti. Oǵan 8-18 jas aralyǵyndaǵy álemniń 87 elinen 1,5 myńdaı sportshy qatysqan bolatyn.
Jas ereksheligine er men qyzdar arasynda 6 kategorııa boıynsha ótken bul dúbirli dodada el namysyn 18 shahmatshy qorǵady. Shveıtsarııalyq júıe boıynsha 11 kezeńnen turatyn bul saıysta 14 jastaǵylar arasynda astanalyq Dınara Sádýaqasova aqtyq oıynda ázirbaıjandyq Ýlvııa Fatalıevadan basym túsip Álem chempıony ataǵyna ıe boldy. Ol 9 oıynda jeńip, ekeýin teń aıaqtap, tek bireýinde ǵana jeńilip qalǵan bolatyn. Al Dınaranyń basty qarsylasy qytaılyq Leı Tıngjı qorytyndy synda jeńilis taýyp, úzdik úshtike kirý múmkindiginen aıyrylyp qaldy. Dınaranynyń jeńisti jolyn odan keıin komandalas sińlileri sátti jalǵastyra aldy. 12 jastaǵylar arasynda Jansaıa Ábdýmálik 9 upaımen kúmis júldeger atandy. Jansaıa 7 oıynda basym túsip, tórt partııany teń aıaqtady. Qurama qorjynyna úshinshi medaldi 8 jastaǵy Ásel Serikbaı saldy. Ol 8 upaımen Álem chempıonatynyń qola júldegeri atandy.
