Dınara Sádýaqasova shahmat oınaý stıli kimge uqsaıtynyn aıtty
ASTANA. QazAqparat - Tanymal shahmatshy, QR áıelder quramasynyń múshesi Dınara Sádýaqasova Astanada ótetin Komandalyq álem chempıonatyna tas-túıin daıyn ekenin málim etti, dep habarlaıdy QazAqparat tilshisi.
Eske sala ketsek, elordada 4-15 naýryz aralyǵynda álemniń 14 elinen eń myqty quramalar qatysatyn klassıkalyq shahmattan komandalyq álem chempıonaty ótedi. Aıtýly chempıonat Qazaqstanda alǵash ret uıymdastyrylyp otyr. Álem chempıonaty «Astana» Halyqaralyq qarjy ortalyǵy ǵımaratynda ótedi dep josparlanǵan. Ondaǵy basty maqsat - jergilikti mamandardan básekege qabiletti halyqaralyq dárejedegi kásibı sheberlerdi qalyptastyrý arqyly Qazaqstannyń adamı resýrsy sapasyn ósirý.
Týrnırde Qytaı, Ázirbaıjan, Iran, AQSh, Reseı, Ulybrıtanııa, Úndistan, Ýkraına, Grýzııa, taǵy da basqa elderden jáne Qazaqstannan 20 qurama - 10 erler jáne 10 áıelder komandasy baq synaıdy. Olardyń arasynda álem chempıondary, kontınenttik chempıondar, FIDE 2018 Olımpıadasynan soń eń joǵary reıtıngterimen 6 komanda, qabyldaýshy federatsııadan eki komanda jáne de FIDE prezıdenti taǵaıyndaǵan eki komanda bolady.
Saryarqa velotreginde klassıkalyq shahmattan komandalyq álem chempıonatyna arnalǵan baspasóz máslıhatynda Dınara Sádýaqasova chempıonatqa daıyn ekenin jetkizdi.
«Mınıstr Arystanbek Muhamedıuly atap ótkendeı, álem chempıonatyna eń myqty shahmat sheberleri keledi. Saıystyń ótkizilýine muryndyq bolyp otyrǵan Mádenıet jáne sport mınıstrligine, Qazaqstan shahmat federatsııasyna alǵys aıtqym keledi. El namysyn qorǵaý úshin barymyzdy salamyz. Osy týrnırde óz áleýetimiz ben kúsh-qýatymyzdy kórsetýge tyrysamyz», - dedi shahmatshy.
Tilshiler Dınara Sádýaqasovaǵa «Álemdik eń myqty shahmatshylar Kasparov, Karpov jáne Fısher desek, siz ózińizdiń oıyn stılińizdi kimge uqsatar edińiz?» degen suraq qoıdy.
«Kúrdeli suraq eken. Meniń oıymsha, oıyn stılim Karpovqa uqsaıtyn sekildi», - dedi Dınara Sádýaqasova.
