Dınara Sádýaqasova Ortalyq Azııanyń shahmat hanshaıymy atandy
ASTANA. QazAqparat - Dınara Sádýaqasova Qazaqstan jáne Ortalyq Azııa shahmatshylary arasynda joǵary reıtıngke ıe boldy, dep habarlaıdy Qazaqstan shahmat federatsııasy.
Halyqaralyq shahmat federatsııasynyń (FIDE) málimetinshe, qazaqstandyq shahmatshy, erler arasynda halyqaralyq shahmat sheberi Dınara Sádýaqasovanyń reıtıngi 2460-qa deıin ósken. Osylaısha, ol álemniń úzdik shahmatshylary tiziminde 23-inshi orynǵa kóterildi.
Bul Qazaqstan jáne Ortalyq Azııa áıelder shahmaty tarıhyndaǵy eń joǵary kórsetkish.
Qazirgi ýaqytta sportshy Azııa shahmatshylary reıtınginde segizinshi orynǵa ıe, al Qazaqstan reıtınginde kósh bastap tur. Aldaǵy josparlary jaıly aıtqanda, Dınara 5 qarasha kúni elordanyń iri saýda ortalyqtarynyń birinde Shahmat akademııasynyń Qazaqstandaǵy UNICEF ókildigimen birlesip ótkizetin blıts-shahmat týrnırine qatysatynyn aıtty. Atalǵan jarys dúnıejúzilik balalar kúnine arnalǵan.
