Dınara Sádýaqasova óńirlerdegi jas shahmatshylarǵa shákirtaqy taǵaıyndady
ASTANA. KAZINFORM – Qazaqstannyń tanymal shahmatshysy Dınara Sádýaqasova Halyqaralyq shahmat kúnine oraı aýqymdy qaıyrymdylyq bastamasyn qolǵa aldy.
Joba daryndy balalardy qoldaýǵa baǵyttalǵan. Óıtkeni olardyń kópshiligine óz áleýetin tolyq ashý úshin tek bastapqy múmkindik jetispeıdi.
Elimizdiń eń ataqty shahmatshylarynyń biri daryndy balalardy qoldaýǵa arnalǵan jeke ataýly shákirtaqy taǵaıyndaǵanyn jarııalady. Baǵdarlamanyń alǵashqy laýreaty ári 1 200 000 teńge kólemindegi maqsatty granttyń ıegeri Atyraý oblysynan shyqqan, bolashaǵynan zor úmit kúttiretin 9 jastaǵy shahmatshy Ermuhan Salamat boldy.
Aldaǵy bir jyl boıy jas sportshy aı saıyn 100 000 teńge kóleminde shákirtaqy alyp, jattyǵýǵa jáne kásibı sheberligin arttyrýǵa kóbirek kóńil bóle alady.
Dınara Sádýaqasovanyń aıtýynsha, Ermuhan jaqsy analıtıkalyq qabiletimen jáne sporttyq áleýetimen erekshelenedi. Alaıda óńirlerdegi kóptegen talantty balalar sııaqty, onyń da ári qaraı damýy men jarystarǵa qatysýy úshin demeýshilerdiń qoldaýy qajet.
«Qazaqstanda shahmatqa qyzyǵýshylyq óte joǵary. Biraq bolashaq chempıondar tek Astana men Almatyda ǵana ósip jatqan joq. Óńirlerde de áleýeti zor balalar kóp. Alaıda kásibı sport, ásirese balalar sportynda, myqty jattyqtyrýshylarǵa, jarystar men oqý-jattyǵý jıyndaryna qarjy qajet. Bul shákirtaqy talanty men tabandylyǵy bar, biraq bastapqy múmkindigi shekteýli balalarǵa naqty qoldaý kórsetýdi maqsat etedi», – deıdi Dınara Sádýaqasova.
Qazaqstandyq grossmeıster aldaǵy ýaqytta shákirtaqy baǵdarlamasy ózge de daryndy balalardy qamtıtynyn aıtty.
Ataýly granttyń iske qosylýy Dınara Sádýaqasovanyń shahmatty damytýǵa baǵyttalǵan uzaq jylǵy qoǵamdyq jáne aǵartýshylyq qyzmetiniń zańdy jalǵasyna aınaldy. Ol elimizde shahmatty keńinen nasıhattap, jas sportshylardy daıarlaý júıesin damytýǵa turaqty úles qosyp keledi.
Bul jumystyń nátıjesi de aıqyn. Onyń akademııasynyń tárbıelenýshileri álem jáne Azııa chempıondary atanyp, halyqaralyq jarystarda júldeli oryndarǵa ıe bolyp júr. Bul jekelegen jetistikter ǵana emes, jas shahmatshylardy daıarlaýdyń tıimdi júıesiniń qalyptasqanyn kórsetedi.
Sonymen qatar Dınara Sádýaqasova shahmat biliminiń qoljetimdiligin arttyrý baǵytynda da belsendi eńbek etip keledi. Ol qazaq tilindegi alǵashqy mamandandyrylǵan oqý quraldarynyń – «Shahmattaǵy alǵashqy qadamdar» jáne «Shahmat oınaýdy úırenemiz» kitaptarynyń avtory. Sondaı-aq óńirlerde turaqty túrde sheberlik sabaqtary men qaıyrymdylyq týrnırlerin ótkizedi.
Dınara Sádýaqasova – jasóspirimder arasyndaǵy birneshe dúrkin álem chempıony, áıelder arasyndaǵy blıts shahmattan álemniń vıtse-chempıony, áıelder arasyndaǵy Azııa chempıony, ıÝNISEF-tiń Іzgi nıet elshisi, áıelder arasyndaǵy halyqaralyq grossmeıster jáne erler arasyndaǵy halyqaralyq sport sheberi.
Aıta keteıik, Garvard pen Oksford shahmatshylary Almatydaǵy álem chempıonatyna qatysady. https://kaz.inform.kz/news/garvard-pen-oksford-shahmatshilari-almatidagi-alem-chempionatina-katisadi-bcb4940f
