Dınara Sádýaqasova kásibı shahmatshylar klýbyn ashýdy usyndy
NUR-SULTAN. QazAqparat – Qazaqstandyq shahmatshy, áıelder arasynda halyqaralyq grossmeıster Dınara Sádýaqasova kásibı shahmatshylardy daıarlaıtyn klýb ashýdy usyndy, dep habarlaıdy QazAqparat tilshisi.
Jerlesimiz kásibı shahmat klýbyn ashý ıdeıasyn elordadaǵy Táýelsizdik saraıynda balalar men jastarǵa arnalǵan damytý ortalyǵynyń ashylýy barysynda ortaǵa saldy.
«Kitaptar shahmatty qalaı jyldam úırený kerektigin ózimniń oınaǵan shahmat partııalarymdy negizge ala otyryp jazǵanymmen erekshelenedi. ıAǵnı, olardyń kómegimen balalar úıde otyryp, daıyn úlgige qarap jattyǵa alady. Taǵy bir kitap qazaq tilinde shyqty. Osy oraıda aıta ketý kerek, qazaqtildi ortada shahmatqa degen qyzyǵýshylyqtyń artqany baıqalady», - dedi D. Sádýaqasova.
Onyń aıtýynsha, shahmat klýbynyń fılıaly elordamen qatar Atyraý qalasynda da bar.
«Óńirlerden kásibı shahmat mektebi nemese klýbyn ashý týraly usynystar kóptep keledi. Degenmen, aldymen sannan góri sapaǵa mán bergimiz keledi, biz úshin bastysy - az bolsa da shahmat úırenýde oń nátıjeniń bolǵany. Sondyqtan da aımaqtarda asyqpaı ashatyn bolamyz. Sonymen qatar, bizge tájirıbeli jattyqtyrýshylardyń sapaǵa jumys istegeni kerek jáne balalarmen til tabysa bilý de - asa mańyzdy», - dedi ol.
Belgili shahmatshynyń sózinshe, ár balada shahmat úırený qabileti bar, tek ony asha bilý kerek.
«Shahmat mektebine balalar 5 jastan bastap qabyldanady. Eger daryndy bala bolsa, onda odan da erterek úıretýge bolady. Osy oraıda Qazaqstannyń túkpir-túkpirinen talantty degen balalardy jınap, kásibı shahmat klýbyn qurý ıdeıasy bar», - dedi shahmatshy.
