Dınara Sádýaqasova bir mezette 70 adammen shahmat oınady
ASTANA. QazAqparat - EHRO kórmesi aýmaǵyndaǵy «Mega Silk Way» saýda oıyn-saýyq ortalyǵynda shahmattan álemniń tórt dúrkin chempıony Dınara Sádýaqasova bir mezettik oıyn ótkizdi, dep habarlaıdy QazAqparat.
Bastapqyda 30 shahmat taqtasynda oıyn ótkizý josparlanǵan edi. Alaıda, 70 áýesqoı shahmatshy dańqty sportshymen bir mezettik oıyn ótkizý múmkindigine ıe boldy. Jalpy, Dınaramen shahmat oınaǵysy kelgen adamdardyń sany 100-den asyp jyǵyldy. Osylaısha, 2 saǵatqa josparlanǵan shara 4,5 saǵatqa sozyldy. Oıyn sońynda qatysýshylarǵa Dınara estelik syılyqtar tabystady.
«Mundaı bir mezettik oıyndar áýesqoı shahmatshylar arasynda ár ýaqytta zor tanymaldyqqa ıe. Degenmen, búgingi oınaǵysy kelgender sany bizdiń kútkenimizden de asyp tústi. Eresekterdiń de balalarmen birge barynsha qyzyǵýshylyq tanytqany tań qaldyrdy. Tipti keıbiri oıynǵa iligý úshin tym erte kelip te alypty. Jyl saıyn qazaqstandyqtardyń arasynda shahmatqa degen súıispenshiliktiń artyp kele jatqandyǵy qýantady», - dedi Dınara Sádýaqasova.
