Dınara Sádýaqasova Astanada halyqaralyq shahmat festıvalin ótkizedi

ASTANA. QazAqparat – Shahmat akademııasy 11-19 shildesi aralyǵynda elordanyń 25 jyldyǵyna oraı «Astana juldyzdary» halyqaralyq shahmat festıvalin ótkizedi, dep habarlaıdy QazAqparat akademııanyń baspasóz qyzmetine silteme jasap.

Túrli álem chempıonattarynyń jeńimpazy Dınara Sádýaqasova basqaratyn akademııa uıymdastyryp otyrǵan týrnırdiń maqsaty – Qazaqstanda shahmatty sport túri retinde tanymal etý jáne damytý, salaýatty ómir saltyn nasıhattaý, jas sportshylardyń sheberligin shyńdaý jáne jas talanttardy izdeý.

Týrnırlerge álemniń 16 elinen 800-den astam shahmatshy qatysady dep kútilýde. Júlde qory – 40 mıllıon teńge.

Festıval aıasynda tórt týrnır ótedi: erler jáne áıelder arasyndaǵy Qazaqstan Respýblıkasy Kýbogynyń kezeńi, áýesqoılar jáne balalar arasyndaǵy báseke jáne blıts.

Jarysqa keletin jetkinshekterdiń arasynda Ekibastuz qalasyndaǵy balalar úıiniń tárbıelenýshileri de bar.

Sonymen qatar «FIDE uıymdastyrýshysy» (FIDE – ulttyq federatsııalardy biriktiretin halyqaralyq shahmat federatsııasy) ataǵyn alý úshin semınar uıymdastyrylady.