Dınara Musaeva - «Jas Qyran arýynyń» ekinshi vıtse-arýy atandy
ASTANA. 11 jeltoqsan. QazAqparat - Quqyq qorǵaý salasyndaǵy qypsha beldi arýlar ózara saıysqa tústi, dep habarlady QR ІІM Kóliktegi ІІD baspasóz qyzmeti.
Mundaı shara elimizde tuńǵysh ret ótkizilip otyr. «Jas qyran arýy-2011» dep atalatyn baıqaýda qutqarýshylar, prokýrorlar, polıtseıler men áskerı saladaǵy bıkeshter baq synasty. Sharanyń negizgi maqsaty - qarapaıym halyqtyń quqyq qorǵaýshylarǵa degen kózqarasyn ózgertý. Sebebi: pogon taqqan polıtseılerge kópshiliktiń qorqynyshpen úrke qaraıtyny málim.
Pogon taqqan arýlar úshin elimizde mundaı baıqaý birinshi ret ótkizilip otyr. Sodan bolar, saıysqa qatysýshy qyzdarda tolqý boldy. Báriniń ishindegi bir arman - elimizdiń quqyq qorǵaý salasyndaǵy nómiri birinshi arýy ataný. Erler arasynda jumys isteıtin bul názik jandylardyń erekshe qoshemetke ıe ekendikterin áriptes jigitter de moıyndap otyr.
- «Qyz bar jerde tártip bar, qyz bar jerde áriptes jigitterdiń ózi galstýgin tartyp, saqaldaryn qyryp keledi. Sondyqtan osyndaı konkýrs uıymdastyryp otyrǵanymyzdyń maqsaty - adamdardyń quqyq qorǵaý salasyna kózqarasyn ózgertý», - deıdi «Jas qyran» Respýblıkalyq áskerı patrıottyq birlestigin damytý ortalyǵynyń tóraǵasy Jaqsybaı Boranbaev.
Saıystyń talaby boıynsha bıkeshter óz-ózderin tanystyryp, ár túrli suraqtarǵa jaýap berdi jáne ónerlerin kórsetti.
Quqyq qorǵaý salasyndaǵy 12 bıkeshtiń ishinen eń myqty, eń sulý arýdy tańdaý ońaıǵa túsken joq. Lıýbov Shaposhnıkova saıys qorytyndysy boıynsha birinshi vıtse-arý atandy. Al Kóliktegi ІІD tergeýshisi, polıtsııa kapıtany Dınara Musaeva ekinshi vıtse-arý júldesine ıe boldy. Bas júldege Іshki ister mınıstrliginiń qyzmetkeri Anar Aıtjanova qol jetkizdi.
