«Dınamo» sport qoǵamy balalarǵa qýanysh syılady
ALMATY. 31 mamyr. QazAqparat - Búgin Almatyda dástúrli «Dınamo» Qazaqstan búldirshinderine» qaıyrymdylyq sharasy ótti.
Ony «Dınamo» dene shynyqtyrý sport qoǵamy» bıyl qalalyq ishki ister departamenti men QR Bilim jáne ǵylym mınıstrliginiń Ulttyq ǵylymı-praktıkalyq dene tárbıesi ortalyǵymen birlesip uıymdastyrdy. Halyqaralyq balalardy qorǵaý kúnine arnalǵan bul sharaǵa Almatydaǵy №1 jáne Almaty oblystyq №2 balalar úıiniń tárbıelenýshileri men №5571 áskerı bólimshe qyzmetkerleriniń, aýǵan soǵysy ardagerleriniń, qyzmetin óteý kezinde qaza tapqan ishki ister organdarynyń balalary jáne jaǵdaıy tómen otbasydan shyqqan 260-tan asa jetkinshekter qatysty. Olardyń barlyǵyna uıymdastyrýshylar sporttyq kıimder men syılyqtar tabys etip, tátti sýsyndar taratyp berdi. Merekelik shara T.Júrgenov atyndaǵy Qazaq ulttyq óner akademııasy stýdentteriniń kontsertimen bastaldy. Sondaı-aq «Dınamo» sport qoǵamynyń sport úıirmelerine qatysatyn jas sportshylar qoıan-qoltyq urysynan, taekvondo, kógaldaǵy hokkeı men kúres túrlerinen qoıylymdyq kórsetilimder qoıdy. Odan keıin túrli sport túrleri boıynsha jarystar ótip, úzdikter syı-sııapatqa ıe boldy.
