«Dınamo-Qazaqstan balalaryna» qaıyrymdylyq aktsııasy bastaldy
ALMATY. 31mamyr. QazAqparat /Erlik Erjanuly/ - Búgin «Dınamo» deneshynyqtyrý jáne sport qoǵamy Halyqaralyq balalardy qorǵaý kúnine oraı «Dınamo-Qazaqstan balaryna» qaıyrymdylyq aktsııasyn bastady.
Dástúrli túrde jyl saıyn ótetin bul sharany «Dınamo» qoǵamynyń jer-jerdegi túrli deńgeıdegi fılıaldary búkil el aýmaǵynda ótkizedi.
«Ony Almaty qalasynda bıyl «Nur Otan» HDP, qalalyq ishki ister departamenti, QR Syrtqy ister mınıstrliginiń dıplomatıkalyq ókildikterdi kúzetetin polıtsııa polki jáne «Shalqar» radıosy men «STV» telearnasy birlesip uıymdastyryp otyr. Dınamo stadıonynda ótip jatqan qaırymdylyq aktsııasyna jetim balalar, balalar úıleriniń tárbıelenýshileri, kúsh qurylymdarynyń qaıtys bolǵan qyzmetkerleriniń jáne az qamtamasyz etilgen otbasylardyń 200-den astam balalary shaqyrylǵan», - deıdi «Dınamo» deneshynyqtyrý jáne sport qoǵamynyń Jurtshylyqpen baılanys basqarmasynyń bastyǵy Gúlzııa Kýznetsova.
Onyń aıtýynsha, merekelik shara kezinde mýzykalyq rok toptar men ártisterdiń qatysýymen kontsert qoıylyp, túrli oıyndar, sporttyq kórsetilimder jáne árqıly baıqaýlar bolady. Sondaı-aq aktsııa kezinde barlyq balalarǵa túrli syılyqtar taratylady.
G. Kýznetsovanyń sózine qaraǵanda, deneshynyqytrý jáne sport qoǵamynyń maqsat sportty balalar men jasóspirimder arasynda nasıhattaý jáne balalar arasyndaǵy tártipsizdiktiń aldyn alyp, nashaqorlyqpen kúresý. Bul baǵytta olar balalardyń bos ýaqytyn tıimdi uıymdastyrý úshin jer-jerde sporttyq úıirmeler uıymdastyryp, turpaqty túrde árqıly jarystar ótkizýde. Sonyń nátıjesinde barlyq sport túrleri boıynsha ulttyq qurama sapyndaǵy sportshlyardyń basym bóligin qazir dınamoshylar qozǵalysynyń ókilderi qurap otyr.
