Dınamıkalyq baqylaýǵa jatatyn sozylmaly aýrýlar tizbesi keńeıdi

ASTANA. KAZINFORM – Densaýlyq saqtaý mınıstriniń buıryǵymen dınamıkalyq baqylaýǵa jatatyn sozylmaly aýrýlar tizimine ózgerister engizildi.

Jalpy tizbege 27 túrli aýrý engizildi, onyń ishinde:

• Sozylmaly vırýstyq V, S jáne D gepatıtteri (baýyr tsırrozynsyz);
• Arterııalyq gıpertenzııa;
• Júrektiń ıshemııalyq aýrýy;
• Brahıotsefalııalyq arterııanyń ekstrakranıaldyq aýrýlary;
• Júrek qaqpaqshasynyń zaqymdanýy;
• Arıtmııa, júrekshelerdiń jybyry men dirili;
• Qan jáne qan túzý aýrýlary;
• Tynys alý aǵzalarynyń aýrýlary;
• As qorytý aǵzalarynyń aýrýlary (onyń ishinde asqazan jáne on eki eli ishek oıyq jarasy, baýyr tsırrozy);
• Qańqa-bulshyqet júıesi jáne dáneker tin aýrýlary;
• Endokrındik júıe aýrýlary, tamaqtaný buzylysy jáne zat almasý buzylysy (onyń ishinde ártúrli deńgeıdegi qant dıabeti);
• Qalqansha bez aýrýlary;
• Júıke júıesiniń aýrýlary (onyń ishinde epılepsııa jáne balalardyń tserebraldy salǵa shaldyǵýy). Buǵan qosymsha júıke júıesiniń basqa da degeneratıvti aýrýlary men ortalyq júıke júıesiniń demıelınızatsııalyq aýrýlary engizildi;
• Nesep-jynys júıesi aýrýlary;
• Áıel jynys aǵzalarynyń qabynýsyz aýrýlary;
• Perınataldyq kezeńde paıda bolatyn jekelegen jaǵdaılar (onyń ishinde týa bitken damý kemistikteri).

Buıryq 2025 jylǵy 2 qyrkúıekten bastap kúshine enedi. 

Aıta keteıik, búgin Prezıdent Densaýlyq saqtaý mınıstri Aqmaral Álnazarovany qabyldap, mindetti medıtsınalyq saqtandyrý júıesin tıimdi etýdi tapsyrdy.