Dınagúl Baesheva: Úreılený koronavırýspen shatastyrýy da múmkin
NUR-SULTAN. QazAqparat – Qazaqstannyń jetekshi ınfektsıonıst dárigeri, medıtsına ǵylymdarynyń doktory Dınagúl Baesheva koronavırýs ınfektsııasy ózine qalaısha psıhologııalyq turǵyda áser etkenin aıtty, dep habarlaıdy QazAqparat tilshisi.
«Ótken aptada men jaǵdaıy aýyr bir balany kórdim. Alaıda onyń koronavırýs ınfektsııasyn juqtyryp alǵanyn múlde oılamadyq ta. Sebebi ata-anasy eshkimmen baılanys bolmaǵanyn alǵa tartty. Alaıda balanyń jaǵdaıy shynynda da aýyr edi. Aqyry testten ótkizip, onyń shynynda da koronavırýs ınfektsııasyn juqtyryp alǵany rastaldy», - dedi Dınagúl Baesheva Densaýlyq saqtaý mınıstrliginiń Facebook paraqshasyndaǵy «Mınıstrlik habarlaıdy» aıdarynda.
Qazaqstannyń jetekshi ınfektsıonıst dárigeri baladan koronavırýs rastalǵannan keıin ózi de qatty úreılenip qalǵanyn jasyrmady.
«Men koronavırýs ınfektsııasyn juqtyryp alǵanyma júz paıyz senimdi boldym. Dene qyzýym kóterilip ketti. Býyndarym qaqsaı bastady. Tanystarymnyń bárine qońyraý shala bastadym. Biraq aqyry aqylǵa keldim. Qaıtadan ystyǵymdy ólshesem +36,7 gradýs bolyp tur eken. Tań qaldym. Sóıtsem bul psıhosomatıka eken. Sol sebepti «bizdi aýrýdan buryn úreı men baıbalam óltiredi-aý» degen oıǵa keldim», - deıdi ol.
Eske sala ketsek, buǵan deıin Dınagúl Baesheva Qazaqstan koronavırýs ınfektsııasymen kúres tásilin nelikten ózgertkenin aıtyp bergen bolatyn.
