Dınagúl Baesheva: Koronavırýs taktıkasyn ózgertti – biz de kúres tásilin jańartyp jatyrmyz
NUR-SULTAN. QazAqparat – Qazaqstannyń jetekshi ınfektsıonıst dárigeri, medıtsına ǵylymdarynyń doktory Dınagúl Baesheva Qazaqstan koronavırýs ınfektsııasymen kúres tásilin nelikten ózgertkenin aıtyp berdi, dep habarlaıdy QazAqparat tilshisi.
«Qazir el ishindegi «koronavırýs juqtyrǵandardy aldymen jatqyzý kerek dedi, keıin kerek emes dedi» degen ýáj aıtylyp jatqanyn bilemiz. Biraq koronavırýsqa qatysty jaǵdaıdyń da ózgeriske ushyrap jatqanyn eskerý kerek. Áý basta juqtyrǵandardyń bárin de tegis jatqyzdyq. Sebebi bizde múmkindik boldy. Infektsııanyń popýlıatsııaǵa ketip qalǵanyn qalamadyq. Barynsha ustap turdyq. Al qazir kontsentratsııa ulǵaıyp ketti. Kezinde adamdardy jatqyzǵan kezde keıbireýler shaǵymdanyp, múlde saý ekenin de aıtyp, shýlasqan edi. Biraq báribir aınalyp kelgende koronavırýstyń el ishine tarap ketkenin kórip otyrmyz», - dedi Dınagúl Baesheva Densaýlyq saqtaý mınıstrliginiń Facebook paraqshasyndaǵy «Mınıstrlik habarlaıdy» aıdarynda.
Koronavırýsqa qatysty jaǵdaıdyń ózgerýine baılanysty onymen kúresýdiń ustanymy men ádisine de ózgerister engizilgen.
«Bul – halyqaralyq standart. Keıbir memleketter birden ujymdyq ımmýnıtetti qalyptastyrýǵa kirisip ketti. Máselen Eýropa elderiniń keıbiri vırýs taraı bersin, tek Qarttar úıin jabamyz desti. Biraq ol elder qazir báribir ákimshilik sharalardy qoldaný kerek ekenin kesh túsinip otyr», - dedi ol.
Dınagúl Baeshevanyń sózinshe, Qazaqstan koronavırýspen kúrestiń jarqyn úlgisin birqatar memleketke kórsete bilgen.
«Al qazir biz osy kúres daǵdysyn ustanyp, tyń amaldy qoldana bilýimiz qajet. Qazir jaǵdaı ózgerdi. Sol sebepti kúres tásilin de ózgertýimiz kerek. Aınalyp kelgende bul – vırýspen soǵys. Vırýs taktıkasyn ózgertýde. Biz de kúres tásilin ózgerýimiz kerek. Qazir shý kóterilip jatyr. Sabyrǵa kelý kerek. Shý eshteńeni sheshpeıdi», - dedi ol.
