Dınagúl Baesheva COVID-2019 qaýpi jaıly: Halyqtyń durys kózqarasy qalyptasty
NUR-SULTAN. QazAqparat – Qazaqstannyń jetekshi ınfektsıonıst dárigeri, medıtsına ǵylymdarynyń doktory Dınagúl Baesheva Qazaqstannyń COVID-2019 aýrýymen júrgizip jatqan kúresine baǵa berdi, dep habarlaıdy QazAqparat tilshisi.
«Qandaı másele týyndamasyn – biz salystyrmaly túrde qaraımyz. Basqa elderge qaraǵanda Qazaqstandaǵy kórsetkish áldeqaıda jaqsy. Birinshiden Úkimetten bastap qarapaıym azamattarǵa deıin bul iske atsalysty. Bul –jumyla istegen jumystyń nátıjesi. Aldyn alý sharalary qabyldandy. Bir-eki kúndi utqannyń arqasynda bul vırýstyń tizgindeı aldyq. Dárigerler men epıdemıologter, Densaýlyq saqtaý mınıstrligi koronavırýstyń keń taralýyn toqtatty», - dedi medıtsına ǵylymdarynyń doktory Densaýlyq saqtaý mınıstrliginiń Facebook -tegi paraqshasyndaǵy suhbat barysynda.
Karantın tártibi qazaqstandyqtarǵa neni úıretti? Bul suraqqa jaýap bergen Dınagúl Baesheva Qazaqstan táýelsiz memleket bolǵaly mundaı indetpen birinshi ret betpe-bet kelgenin eske saldy. Onyń aıtýynsha koronavırýstyń ishine birneshe shtamm kiredi. Mysaly Ońtústik Koreıa, Qytaı, Sıngapýr elderinde 2000 jyldardan beri ártúrli shtamdary kezdesken.
«Sodan beri koronavırýstyń bul shtamdarynan qanshama adam qaıtys bolyp ketti. Sondyqtan ondaǵy adamdar indetke tez úırenip alǵan. Pandemııa bastaldy degen kezde jyldam oqshaýlanyp, qorǵanys shekteýlerin ustana bildi. Bizdiń el de osyndaı sharalardy qoldana bilgenin atap ótý kerek. Qazaqstanda koronavırýs tirkelmeı jatyp, aqparattyq túsindirý jumystary óte jiti júrgizildi. Halyq bildi. Kóbi qorǵanys sharalaryn qabyldap, qazir de betperde taǵyp, bir-birine asa jaqyndaı qoımaıdy. Halyqtyń durys kózqarasy qalyptasty. Osynyń báriniń arqasynda koronavırýstyń kóz jumǵan adamdardyń sany basqa elderge qaraǵanda tómendeý bolyp otyr», - dedi ol.
Qazaqstannyń jetekshi ınfektsıonıst dárigeri keıbir adamdardyń «koronavırýsty jalǵan» dep senbegenin de aıtyp ótti.
«Koronavırýstan osy ýaqytqa deıin kóz jumǵan adamdardyń keıbiri toıǵa baryp, júrip qalǵan. Artynsha ol adamdar birtalaı kisige juqtyrdy. Qazir de ondaı jaǵdaı bar. Shetelden kelip jatqan azamattar da az emes. Keıbiri qaýipsizdik sharalaryn qabyldady. Keıbir jaǵdaıda múldem basqasha, máselen Qyzylordada azamattardyń biri Máskeýden ushyp kelip, erteńinde úıine qonaq shaqyryp bárine vırýs juqtyrǵan. Іndetke qatysty adamdar ártúrli kózqarasta. Biraq bul ınfektsııa juqpaly ekenin, kópke zııanymyzdy tıgizip alýymyz múmkin ekenine kózimiz jetip otyr», - dedi ol.
Dınagúl Baesheva aldaǵy ýaqytta gıgıena saqtaý kerektigin eskertedi. Túshkirý men jótelýdiń mádenıetin úırenip, maska taǵyp, qoldy jýyp, betti jıi ustaı bermeýdiń arqasynda koronavırýstan saqtana alatynymyzdy aıtady.
