Dına Tańsári Chernogorııadan baspana surady

ASTANA. KAZINFORM — 15 sáýirde ekstradıtsııalaý rásimi aıasynda Chernogorııa soty Dına Tańsárini onyń Chernogorııadan baspana surap qaralmaǵan ótinishine baılanysty qamaýdan bosatty, dep habarlaıdy QR Bas prokýratýrasynyń baspasóz qyzmeti.

— Qazaqstan Respýblıkasy men Chernogorııa Respýblıkasy arasynda berý týraly halyqaralyq shart bolmaǵandyqtan, ony ekstradıtsııalaý týraly sheshimdi Chernogorııanyń quzyretti organdary ulttyq zańnamasyna sáıkes qabyldaıdy, — dep habarlady Bas prokýratýra.

Sondaı-aq vedomstvoda Qazaqstanda Dına Smaıylovaǵa (Tańsári — red.) qatysty qylmystyq is boıynsha sotqa deıingi tergeý merzimi toqtatylǵanyn atap ótti.

Eske sala ketsek, 2023 jyly 27 jeltoqsanda Іshki ister mınıstrligi quqyq qorǵaýshy, «Ne molchı» qorynyń basshysy Dına Tańsárige izdeý jarııalady.

Almaty qalasynyń, Shyǵys Qazaqstan jáne Almaty oblystarynyń polıtsııa departamentteri oǵan qatysty kórineý jalǵan aqparat taratý, jeke ómirge qol suǵylmaýshylyqty buzý faktileri boıynsha 6 qylmystyq is qozǵap, tergep jatyr. Onyń ishinde eki is — alaıaqtyq boıynsha.

Buǵan deıin Dına Tańsáriniń Chernogorııada ustalǵanyn, onyń Qazaqstanǵa ekstradıtsııalanýy múmkin ekenin habarlaǵan edik.

Keıinnen Chernogorııa bıligi Dına Tańsárini qamaýdan bosatqanyn jazǵan bolatynbyz.