Dına Tańsári Chernogorııada ustaldy jáne Qazaqstanǵa ekstradıtsııalanýy múmkin

ASTANA. KAZINFORM — Zorlyq-zombylyq qurbandary týraly aqparat taratatyn «NeMolchıKZ» qorynyń basshysy Dınara Smaıylova (Dına Tańsári) Chernogorııada ustaldy jáne tańǵa deıin ýaqytsha ustaý ızolıatorynda bolady. Bul týraly Dınaranyń ózi jáne qor ókilderi habarlady.

− Meni jańa ǵana ustap, Podgorıtsanyń (Chernogorııa astanasy — red.) polıtsııa bólimine ákeldi. Erteń ekstradıtsııa boıynsha sot ótedi. Bul sottyń qandaı sheshim shyǵararyn bilmeımin, biraq tańǵa deıin meni Chernogorııa polıtsııasynda ustaıtynyn aıtty. Jalpy, erteń sottyń sheshimi belgili bolady. Meni ne úshin ustaǵanyn bilmeımin. Meni jaı ǵana sotqa ákelýge bolar edi, biraq tańǵa deıin osynda ustaǵylary kelip otyr. Dostar, sizderdiń qoldaýlaryńyzdy suraımyn. Munyń bári nemen aıaqtalaryn bilmeımin, biraq meni ekstradıtsııalamaıdy dep úmittenemin, − dedi ol áleýmettik jelidegi beıneúndeýinde.

Osy oraıda, Kazinform agenttigi QR Bas prokýratýrasyna, QR Іshki ister mınıstrligine habarlasty. Aqparat naqtylanyp jatqany týraly jaýap aldyq. Al QR Syrtqy ister mınıstrligi quqyq qorǵaý organdaryna jol siltedi. 

Eske sala ketsek, 2023 jyly 27 jeltoqsanda Іshki ister mınıstrligi quqyq qorǵaýshy, «Ne molchı» qorynyń basshysy Dına Tańsárige izdeý jarııalady.

Almaty qalasynyń, Shyǵys Qazaqstan jáne Almaty oblystarynyń polıtsııa departamentteri oǵan qatysty kórineý jalǵan aqparat taratý, jeke ómirge qol suǵylmaýshylyqty buzý faktileri boıynsha 6 qylmystyq is qozǵap, tergep jatyr. Onyń ishinde eki is — alaıaqtyq boıynsha.