Dına orkestriniń ujymy astrahandyqtar chellendjin BQO-daǵy áriptesterine joldady
Orkestr basshysy Baqytbek Sartbaevtyń aıtýynsha, Reseıdegi qandas dombyrashylardyń chellendjin qabyldaýdyń sımvolıkalyq máni bar. Óıtkeni, Dına anamyz – uly kúıshi Qurmanǵazynyń tól shákirti.
«Mereıtoı aıasynda uly kúıshi, kompozıtor babamyzdyń máńgilik meken tapqan orny – Reseı Federatsııasynyń Altynjar aýylynda ornalasqan Qurmanǵazy óńirlik mádenı ortalyǵynan Atyraý oblysyna chellendj joldanǵan edi. Dına Nurpeıisova atyndaǵy akademııalyq qazaq halyq aspaptary orkestri osy chellendjdi qabyldap, Batys Qazaqstan oblysynyń Dáýletkereı atyndaǵy qazaq halyq aspaptary orkestrine joldady», - deıdi Baqytbek Sartbaev.
Buǵan deıin «Adaı» kúıin kúmbirletken astrahandyqtar Atyraý oblysyna chellendj joldaǵanyn jazǵan edik. Reseılik dombyrashylar Qurmanǵazy kesenesiniń aldynda kompozıtordyń «Adaı» kúıin oryndaǵan. Olardyń arasynda eresekter de, balalar da bar.
«Bıyl qazaqtyń uly kompozıtory, kúıshi, dombyrashy Qurmanǵazy Saǵyrbaıulynyń mereıtoıyn atap ótemiz. Osyǵan oraı, biz – Astrahan oblysynyń dombyrashylary Atyraý oblysyna chellendj joldaımyz», - degen edi Qurmanǵazy atyndaǵy óńirlik mádenı ortalyǵynyń dırektory Amangeldi Ábilǵazıev.
Qazaq jerinde kindik qany tamǵan uly kúıshi Reseı Federatsııasynyń Volodar aýdanyndaǵy Altynjar aýylynda jerlengen.
«Altynjar aýylynda 2005 jyly Qurmanǵazy atyndaǵy óńirlik mádenı ortalyq ashyldy. ortalyqqa alys-jaqyn shetelderden jyl saıyn myńǵa jýyq adam keledi. Týrısterge Qurmanǵazy Saǵyrbaıulynyń, onymen zamandas bolǵan qazaqtardyń ómiri týraly maǵlumat beremiz. Ortalyqtaǵy mýzeıde uly kúıshiniń shyǵarmashylyǵy, ómiri týraly syr shertetin eksponattar qoıylǵan», - deıdi Amangeldi Ábilǵazıev.
