Dına ónerin jalǵastyrýshy jas urpaqtar kóptep ósip keledi - Aıgúl Úlkenbaeva
ALMATY. 6 jeltoqsan. QazAqparat /Názıra Eleýhan/ - Dına ónerin jalǵastyrýshy jas urpaqtar, daryndy kúıshiler kóptep ósip keledi.
Bul týraly QR Eńbek sińirgen ártisi, belgili kúıshi Aıgúl Úlkenbaeva Almatyda ótken Dına Nurpeıisovanyń 150 jyldyǵyna arnalǵan saltanatty kesh barysynda aıtty.
Aıgúl Úlkenbaevanyń sózine qaraǵanda, Dına mektebi eń kúrdeli oryndaýshylyq mektebi bolyp sanalady. «Soǵan qaramastan, kúılerin jaqsy meńgergen jas kúıshiler kóptep shyǵýda. Qazir ónerli jastar úshin Dına apamyzdyń kúı ónerin bilgisi keletin, dombyra qulaǵynda oınaımyn deıtin barlyq jandar úshin Dına Núrpeıisovanyń óziniń oryndaýyndaǵy bizge jetken kúıleri, jazylǵan úntaspalary bar. Dına mektebiniń kúıleri sondaı-aq konservatorııanyń arnaıy oqý baǵdarlamasyna engizilgen»,-deıdi tanymal kúıshi.
«Árbir kúıine «Qazaq» degen eliniń búkil bolmys-bitimin, taǵdyryn, tarıhyn arqaý etken, jurtynyń rýhyn asqaqtatqan dombyranyń «bulbuly» Dına - rýhanı álemimizdegi jarqyn tulǵa. «Ǵasyr sańlaǵy» bolyp tabylatyn Dına Núrpeıisovanyń murasyn urpaqtan-urpaqqa jetkizý jóninde elimizde kóptegen sharalardyń atqarylyp, nasıhattalyp jatqandyǵyna qýanyshtymyn. Almatydaǵy Dına Nurpeıisovanyń 150 jyldyǵyna arnalǵan saltanatty kesh úlken toıdyń jalǵasy boldy. Osyndaı ǵajaıyp daryn ıesin laıyqty ulyqtaýyn egemendigimizdiń arqasy dep bilemin»,-deıdi ol.
