«Dına Nurpeıisovanyń álemi» atty antologııalyq, monografııalyq jınaq ázirlenýde
Bul eńbekte Qazaqstannyń halyq ártisi, kúı anasy atanǵan Dına Nurpeıisova týraly tarıhı derekter, syr-suhbattar, oı tolǵaýlar, esseler, ýaqyttyń ár kezeńderinde jaryq kórgen, basylymdardan kóshirilip jazylǵan maqalalar, notalyq kúı shyǵarmalary jáne foto derekter toptastyryp jınaqtalady.
Osy kólemdi jınaqty qurastyrýshy - pedagogıka ǵylymynyń kandıdaty, professor Tólegen Qýanyshev. Aıta ketý kerek, Tólegen Shańǵytbaıuly uly kúıshiniń jıeni bolyp keledi. Tólegen Qýanyshevtyń anasy Aqjan - Dınanyń nemeresi, ıaǵnı uly Jurymbaıdyń qyzy.
«Osyndaı bir jınaq shyǵarý týraly oı kópten kókeıimde júr edi. Al oǵan baspasóz betinde jazylyp júrgen pikirler qozǵaý boldy. Ár jerde shashyrap júrgeni, ár túrli derekterdiń qaıshylyqtary meni tolǵandyrdy. Oıdan shyǵaryp aıtylyp jatyr desem artyq shyǵar, biraq jobamen jazylyp júrgen derekter bar ekeni jasyryn emes. Tipti «kúıshi anamyz elimizdiń batysynda emes, basqa óńirde dúnıege kelgen eken» degen pikirler de emis-emis estilip qalady. Sondaı-aq Dına týraly materıaldardyń basyn qosyp, úlken bir dúnıe shyǵarý jóninde kezinde Qarshyǵa Ahmedıarov birneshe ret maǵan aıtqan bolatyn. Mine, soǵan oraı osyndaı eńbekti daıyndaý isine kirisip kettim. Josparly túrde jumys istep, qolymda bar materıaldardy bir júıege keltirýime kandıdattyq jumyspen aınalysqanym da óz paıdasyn tıgizdi»,- deıdi Tólegen Qýanyshev.
Materıaldar áli de jınaqtalý ústinde. Bul kommertsııalyq joba emes. Uly kúıshi týraly jazylǵan málimetterdi bir ortaǵa toǵystyrý maqsatynan týyndaǵan ıgilikti is ekeni anyq.
Bul qurastyrylǵan tarıhı jınaqtyń qalyń oqyrmanǵa berer ǵıbraty mol dep esepteımiz.
