Dına Islambekova Azııa chempıonatynda Qazaqstan qorjynyna ekinshi altyndy saldy
ASTANA. KAZINFORM – Mońǵolııa astanasy Ulanbatyr qalasynda ótip jatqan World Boxing aıasyndaǵy 2026 jylǵy Azııa chempıonatynyń fınalynda el quramasynan Dına Islambekova (80 keliden joǵary) synǵa tústi.
Otandasymyz fınalda úndistandyq Alfııa Pazanmen qolǵap túıistirdi.
Dına Islambekova 2019 jyly álem chempıonatynda qola júldeger atanǵan edi. Bul joly ol alǵashqy raýndta qarsylasyn nokdaýnǵa túsirip, basymdyqqa ıe boldy. Qalǵan ýaqytta da Dına óziniń jeńisine kúmán týdyrmady. Qorytyndy esep: 5:0
Aıta ketsek, budan buryn el quramasynan Nadejda Rıabets (80 keli) fınalda ózbekstandyq Rýhshona Parpıevany qapy qaldyryp, Azııa chempıony ataǵyn jeńip aldy. Sondaı-aq Baqyt Seıdish (70 keli) fınalda úndistandyq Arýndhatı Choýdharıge ese jiberdi.
Qurlyqtyq dodada 10 sáýirde qazaqstandyq bes boksshy altyn medaldy sarapqa salady. Olardyń qatarynda erlerde Orazbek Asylqulov (60 keli), Tórehan Sabyrhan (70 keli), Sabyrjan Aqqalyqov (75 keli), Nurbek Oralbaı (85 keli), Aıbek Oralbaı (90 keliden joǵary) bar.
Búgin qazaqstandyq úsh boksshy sharshy alańǵa shyǵady. El quramasy fınalǵa shyqqan sportshylar sany jóninen jalpy esepte Úndistanmen alǵashqy eki oryndy ózara bólisip tur.
Sondaı-aq Azııa chempıonatynda Ózbekstan - 7, Soltústik Koreıa men Qytaı - 3, Taıpeı, Mońǵolııa, Taıland, Iordanııa, Japonııa - 2, Tájikstan 1 úzdigine úmit artady.
Buǵan deıin Azııa chempıonaty fınalyna qaı elden qansha boksshy shyqqanyn jazǵanbyz.
Azııa chempıonatynyń fınaly 9-10 sáýir kúnderine belgilengen.
