Din vaktsınaǵa qarsy emes: Elordada dinı qyzmetkerler halyqty ekpe alýǵa shaqyrdy

NUR-SULTAN. QazAqparat - Nur-Sultan qalasynyń din qyzmetkerleri qala turǵyndary men qonaqtaryn koronavırýs indetine qarsy vaktsına alýǵa shaqyrdy, dep habarlaıdy elorda ákimdiginiń resmı saıty.

«Álemge zııanyn tıgizip jatqan indetke qarsy vaktsına alý áýeli ózimiz úshin jáne otbasymyz, bala-shaǵamyz, aǵaıyn-týysymyz, dostarymyz, sol sııaqty qoǵam úshin qolǵa alatyn máseleniń biri. Dinimizde densaýlyq, adam ómiri eń birinshi turatyn úlken qundylyqtyń biri. Bul indetti toqtatý úshin vaktsına alý jaqsylyq dep aıtýǵa bolady. Ózimizdi jáne qorshaǵan ortany, qoǵamymyzdy osy bir indetten qorǵaýdyń jalǵyz tıimdi joly – ekpe. Degenmen eshkimdi zorlamaıtynyn da eske salyp óteıik. Dinimizde zorlyq-zombylyqqa jol joq ekeni aıtylǵan. Bul – árkimniń óz qalaýy. Óz basyma kelsek, vaktsınany densaýlyǵym úshin aldym. Odan aýyryp qalý, qandaı da bir qıyndyq sezilgen joq. Bári jeńil ótti», - deıdi respýblıkalyq Áziret Sultan meshitiniń naıb ımamy Jumanazar Sadyrhanov.

COVID-19 indetinen qorǵanýdyń jalǵyz joly – vaktsına alý arqyly ujymdyq ımmýnıtetti damytý, osylaısha karantınge deıingi qalypty ómirge oralý mańyzdy.

Al ujymdyq ımmýnıtetti damytý úshin qala turǵyndarynyń 60 paıyzy ekpe alýy qajet.

«Bıyl mamyr aıynda vaktsınanyń ekinshi komponentin alyp, tolyq ımmýndaýdan óttim. Óz erkimmen aldym. Ekpe qoǵam densaýlyǵy úshin mańyzdy is dep oılaımyn. Bul pandemııa, ıaǵnı koronavırýs indeti búkil álemge, árbir salaǵa zııanyn tıgizip otyr. Bizde osy bir qıyndyqtan shyǵatyn, pandemııany jeńetin múmkindik bar. Sol sebepti vaktsına alý qajet dep esepteımin. Álemniń túrli elderinde indetke qarsy vaktsına ázirlendi. Al ekpege kúmán keltiretinderge aıtarym, dinı kózqaras vaktsınaǵa eshqashan qarsy emes jáne qarsy bolýy da múmkin emes. Mundaı jaǵdaıda kúmán týdyrýǵa jol joq. Koronavırýs indetine qarsy turýda vaktsına aǵzamyzdy qorǵap turady», - deıdi Nur-Sultan qalasy Ýspen kafedraldy soborynyń aǵa dinı qyzmetkeri Dmıtrıı Baıdek.

Aıta keteıik, Nur-Sultan qalasy epıdemıologııalyq ahýaldy baǵalaý boıynsha bes aıdan beri «qyzyl» aımaqta tur.

Koronavırýspen aýyratyndar sanynyń ósýi toqtar emes, kún saıyn 1200-1300-ge jýyq naýqas anyqtalady.

Epıdemıologııalyq jaǵdaıǵa baılanysty elorda turǵyndary men qonaqtary óz densaýlyǵyn jáne ózgelerdi qorǵaýy úshin sanıtarlyq normalardy, shekteý sharalaryn qatań saqtaýy tıis.