Din ýaǵyzdaýshylardyń jalǵan túsinikterine qarsy áreketter kerek - Senat Tóraǵasy
«Qazirgi zamannyń syn-qaterlerine jaýap izdeýde musylman ǵulamalary óz qoltańbalaryn qaldyryp, bilim men beıbitshilikke degen súıispenshilik týraly Qasıetti Quran ilimderin qaıta jandandyrýǵa tıis. Bul iste ǵulamalar qasıetti jazbanyń ulaǵatty sózderin kúmándi ýaǵyzdaýshylar usynyp júrgen jalǵan túsinikterge qarsy qoıýy kerek. Islamnyń irgeli qaǵıdattary týraly aıtar bolsaq, osy tusta musylman áleminiń saıasatkerleri men ǵalymdaryn ıslamnyń bolmysyn, beıbitshilik pen meırimdiliktiń, tózimdilik pen ádilettiliktiń dini retinde qalyptastyrýǵa kúsh salýǵa shaqyrǵan Prezıdent Nursultan Nazarbaevtyń sózderin esterińizge salǵym keledi. Islam amalsyzdyq pen fanatızmdi joqqa shyǵaryp, qarsylastardy tatýlastyrýǵa jáne qaıshylyqtardy bitimgerlik jolmen sheshýge umtylady», - dep toqtaldy Q. Toqaev.
Budan bólek ol elimizde júzege asyrylyp jatqan Rýhanı jańǵyrý baǵdarlamasyna toqtaldy.
«Bizdiń oıymyzsha, ıslam ilimi ulttyq salt-dástúrlerge degen qurmetpen jáne Otanǵa degen súıispenshilikpen ushtasa otyryp, qoǵamdy rýhanı jańartý ıdeıasymen úndesedi. Memleket basshysynyń bastamasymen elimizde júzege asyrylyp jatqan «Bolashaqqa baǵdar: Rýhanı jańǵyrý» baǵdarlamasy el damýynyń jarqyn úlgisi men naqty qadamdaryn aıqyndady. Baǵdarlama sanany jańǵyrtý, ulttyq bolmystan, ulttyq kodtan aırylyp qalmaýǵa baǵyttalǵan. Olardy álemdik qundylyqtarmen úılestirip, Qazaqstannyń ıgiligine jaratý qajet. Sondaı-aq, baǵdarlama ulttyq rýhymyzǵa sáıkes keletin qundylyqtardyń barlyǵyn, onyń ishinde salt-dástúrlerdi, til men ónerdi, ádebıet pen rýhanı baǵdarlardy saqtap qalýdy kózdeıdi», - dep túıdi Senat Tóraǵasy.
