Din salasyndaǵy zań jobasyna qandaı ózgerister engizildi

ASTANA. QazAqparat - Búgin QR Din isteri jáne azamattyq qoǵam mınıstri Nurlan Ermekbaev shetel dıplomattary úshin arnaıy baspasóz máslıxatyn ótkizip, dinı qyzmet pen dinı birlestikter týraly zańnamanyń negizgi ózgeristerin túsindirdi, dep xabarlaıdy QazAqparat tilshisi.

Mınıstrdiń aıtýynsha, zań jobasyna "destrýktıvti dinı aǵym" jáne "dinı radıkalızm" uǵymdary engizilip otyr. "Bizdiń qazirgi zańnamamyzda dinı radıkaldy is-árekettiń naqty anyqtamasy joq. Qoǵamda ondaı áreketter bar. Biraq zańdy anyqtamasy jazylmaǵan. Sondyqtan biz Eýropa elderiniń tájirıbesin eskerip, "destrýktıvti dinı aǵym" jáne "dinı radıkalızm" uǵymdaryn engizgendi qup kórdik", - deıdi Ermekbaev.

Mınıstrdiń sózine qaraǵanda, búginde destrýktıvti dinı aǵymdarǵa túbegeıli tyıym salý múmkin emes. Sebebi ondaı uıymdardyń naqty bir qurylymy, ıa bolmasa, bas keńsesi joq. Al zań júzinde destrýktıvti dinı aǵymǵa naqty anyqtama berilse, bytyrap júretin radıkaldardyń áreketine quqyqtyq baǵa berip, jaýapqa tartýǵa bolady. "Osylaısha, dindi jamylyp, radıkalızm men terrorızm ıdeıalaryn taratyndarǵa tosqaýyl qoıýǵa múmkindik bar", - dep atap kórsetti Ermekbaev myrza.

Aıta keteıik , búgingi baspasóz máslıxaty QR Syrtqy ister mınıstrliginde ótti. Mınıstr memlekettik qyzmetshilerdiń dinı ustanymyna qatysty naqty úsh shekteýdiń bolatynyn jetkizdi. Budan bólek, adamnyń bet-álpetin tumshalaıtyn kıimderge qatysty túsinik berdi .