Din salasynda áıelder uıymynyń kózge túserlik jumysy baıqalmaıdy – vıtse-mınıstr
«Jalpy, bizdiń elimizde otbasylyq, genderlik máselelermen aınalysatyn 77 úkimettik emes uıym bar eken. Biraq, kóz júgirtsek, birde-bireýi din salasyna asa atsalysyp jatqan joq sekildi. Oblystarda olarǵa 235 mln teńge bólinedi eken. 126 joba iske asyrylyp jatyr. Bizdiń ortalyqta da otbasylyq qundylyqtarǵa baılanysty deńgeıde de birneshe joba bar. Al biraq, onyń aıtarlyqtaı kózge túserlik jumysyn, áserin de kórip otyrǵan joqpyz. Bizdiń maqsatymyz - dinı radıkalızmniń aldyn alý. Bul salada elimizde qordalanǵan máseleler kóp. Onyń ishinde mysaly keshegi «Jýsan» operatsııasymen elge kelgen 150 áıeldiń taǵdyry. Ol kisiler – júregi jaralanǵan azamattar. Kóbisi eriksiz ketken», - dedi Marat Ázilhanov elordada ótip jatqan «Jastardy rýhanı, adamgershilik tárbıeleýdegi jáne radıkaldy dinı ıdeologııaǵa ımmýnıtetti qalyptastyrýdaǵy áıelder uıymdarynyń róli» atty respýblıkalyq ǵylymı-praktıkalyq konferentsııada.
Vıtse-mınıstrdiń aıtýynsha, Sırııadan kelgen áıeldermen jumys júrgizý kerek.
«Negizi ózimizdiń aramyzdan áıelder uıymdary jumys istese deımiz. Odan qaldy sol jaqta qaza tapqan er kisilerdiń otbasylary, balalary men áıelderi bar. Ártúrli jaǵdaımen abaqtyǵa túskenderdiń otbasylary men áıelderi bar. Odan qaldy bizdiń óńirlerde áıelder jamaǵaty baryn jasyrýdyń keregi joq. Ol da durys shyǵar. Eshqandaı renjıtin sóz emes shyǵar – áıelder ózderi birigip, jamaǵat bolyp jatyr. Ol da belgili jaı. 5 myńǵa jýyq sondaı kisiler bar elde. Alaıda kóp jerde olar jabyq túrde bir-birimen aralasady. Syrtpen baılanysy joq. Ózderimen ózderi júredi. Qıyndyqtary bar. Jumys tappaı, balalaryn balabaqshaǵa ornalastyra almaıdy. Olarmen de jumys júrgizý kerek. Jalpy, qoǵamǵa din salasyndaǵy bar qaýip-qaterlerdi menińshe, áıelden artyq eshkim jetkize almaıtyn sııaqty», - dedi Marat Ázilhanov.
