«Din psıhologııasy» mamandyǵy alǵash ret joǵary bilim berý baǵdarlamasyna engizildi

ASTANA. QazAqparat – «Din psıhologııasy» mamandyǵy alǵash ret joǵary bilim berý baǵdarlamasyna engizildi. Bul týraly Aqparat jáne qoǵamdyq damý mınıstrliginen málim etti, dep habarlaıdy QazAqparat tilshisi.

«Ǵylym jáne joǵary bilim mınıstrligi jáne jergilikti atqarýshy organdar otandyq oqý oryndarda din salasyndaǵy mamandyqtar boıynsha bilim alýǵa nıetti talapkerler úshin bilim granttaryn bóletinin atap ótý qajet. 2022-2023 oqý jyldaryna bilim berý baǵdarlama toptary bólinisinde «Dintaný», «Islamtaný» jáne «Teologııa» mamandyqtary boıynsha joǵary jáne joǵary oqý ornynan keıingi bilimi bar kadrlardy daıarlaýǵa memleket tarapynan 287 memlekettik bilim granty bólingen», - dep atap ótedi mınıstrlik agenttiktiń resmı saýalyna bergen jaýabynda.

Elimizde dintanýshy-psıholog, teolog-psıholog mamandaryn daıarlaý qajettiginiń týyndaýyna baılanysty mınıstrliktiń bastamasymen L.Gýmılev atyndaǵy Eýrazııa ulttyq ýnıversıtetinde «Din psıhologııasy» mamandyǵyn ashý josparlanǵan.

«Osy rette atalǵan ýnıversıtet 7M022 - Gýmanıtarlyq ǵylymdar baǵyty, M051 - «Dintaný jáne teologııa» bilim berý baǵdarlama tobynyń magıstratýra deńgeıi boıynsha «Din psıhologııasy» bilim berý baǵdarlamasyn ázirlep, bıyl maýsym aıynda Joǵary bilim berýdi damytý ulttyq ortalyǵynyń bilim berý baǵdarlamasy tizilimine engizdi jáne 2023-2024 oqý jylyna stýdentterdi qabyldaýdy josparlap otyr. Bul óz kezeginde destrýktıvti dinı aǵymdardan zardap shekken, elge oralǵan azamattardy radıkaldy kózqarastan aryltý jumystarynyń tıimdiligin joǵarylatady dep kútilýde», - dedi vedomstvodan.