Din mınıstri Qoǵamdyq keńester jumysyndaǵy problemalardy atady
ASTANA. QazAqparat - Qazaqstanda Qoǵamdyq keńesterdiń qyzmetine keri áserin tıgizetin birqatar másele bar. Bul týraly búgin Úkimet otyrysynda QR Din isteri jáne azamattyq qoǵam mınıstri Nurlan Ermekbaev aıtty, dep habarlaıdy QazAqparat.
Onyń aıtýynsha, taıaýda Qoǵamdyq keńesterdiń birinshi respýblıkalyq májilisi ótti. Onda 500-den astam delegat ózekti máselelerdi talqyǵa salyp, ony jetildirý boıynsha naqty usynystarymen bólisti.
«Birinshiden, qoǵamdyq keńesterdiń qyzmetine keri áserin tıgizetin máselelerdiń biri - onyń sapalyq quramy. Taldaý jumystary keńesterdiń sapalyq quramynyń, ártúrli sala ókildikteri men sanattarynyń birkelki emestigin kórsetti. Ekinshiden, qajetti qarjylandyrýdyń bolmaýy Keńesterdiń óz maqsattaryna jetýine qıyndyq týǵyzýda degen pikirler aıtyldy. Alaıda, birqatar sarapshylar kerisinshe, Keńesterdi memlekettik qarjylandyrý olardyń avtonomııalyq sıpatynan aıyryp, qyzmettiń táýelsizdigin joǵaltýǵa ákep soǵýy múmkin degen pikir aıtty», - dedi mınıstr.
Degenmen, Nurlan Ermekbaevtyń pikirinshe, jekelegen bıýdjettik shyǵyndardy qarastyrý qajettiligi bar. Máselen, aımaqtarǵa shyǵý issaparlary men keńse shyǵyndaryn memleketten qarjylandyrǵan jón.
«Úshinshiden, keńes músheleriniń pikirinshe, qarastyrylatyn normatıvtik-quqyqtyq aktiler sanynyń artýynan, keńesterdiń jumys kólemi ulǵaıǵan. Sonymen qatar, normatıvtik-quqyqtyq aktilermen jumys júrgizý úshin arnaıy bilim men salalyq biliktilik qajet. Osyǵan oraı, quqyqtyq aktilerdi qarastyrýdy keńes músheleriniń óz sheshimine qaldyrý múmkindigin berý kerek»,- dedi ol.
Sonymen qatar mınıstr Keńes qyzmeti, ásirese, Keńester quramyna konkýrstar týraly aqparattyń buqaralyq aqparat quraldarynda jetispeýshiligi baıqalatyndyǵyn aıtty.
«Jalpy, joǵaryda atalǵan máselelerdi Ekonomıkalyq yntymaqtastyq jáne damý uıymynyń sarapshylary da óz usynymdarynda birneshe ret atap ótken bolatyn»,- dedi Ermekbaev.
