Din men tilge bólmeıtin Naýryz meıramy táýelsizdik jyldary ulysty uıystyra tústi-Elbasy
ANA. 22 naýryz. QazAqparat - Búgin Memleket basshysy Nursultan Nazarbaev «Naýryz meıramy» merekesine arnalǵan saltanatty is-sharaǵa qatysty. Merekelik is-shara Astanadaǵy «Qazaq eli» monýmenti alańynda ótti. QazAqparat tómende Elbasynyń Astana turǵyndary men qonaqtary aldynda sóılegen sóziniń mátinin taratady.
Qymbatty otandastar!
Halqymyz uly kúnge balaǵan, jyl basy sanaǵan jasampaz Naýryz - birlik pen bereke meıramy.
Barshańyzdy osy ulaǵatty merekemen shyn júrekten quttyqtaımyn!
Dastarqanǵa aq tolatyn, elimizge baq qonatyn búgingi araıly shaqty halqymyz Ulystyń uly kúni dep ulyqtaǵan.
Kún men túndi teńegen, irgemizdi izgilikke bólegen Naýryz búkil adamzatqa shattyq syılaıdy.
Jyl basy Naýryzben birge yzǵarly qystyń ornyn shýaqty kóktem basyp, tirshilik qaıta túleıdi.
Bul kúni adamdar bulaq kózin ashyp, tal ekken, joq-jitikke járdemdesken.
Alys ketken aǵaıyn qaýyshqan, araz jandar tatýlasyp, qaıta tabysqan.
Barshańyz bilesizder, babadan jetken jyl qaıyrý dástúri boıynsha, bıyl qoıan jyly kiredi.
Qoıandy halqymyz qamba tolatyn molshylyqtyń nyshany dep sanaıdy.
Qazaq eliniń ǵasyrlar boıy ańsary bolǵan qasterli Táýelsizdikke bıyl 20 jyl tolady.
Sondyqtan búgingi shara Táýelsizdik saraıy aldynda, altyn samuryǵy aspandaǵan «Qazaq eli» alańynda ótýde.
Qadirli qaýym!
Barshańyz bilesizder, osydan 20 jyl buryn meniń arnaıy Jarlyǵymmen Naýryz memlekettik mereke retinde alǵash atap ótildi.
Din men tilge bólmeıtin Naýryz meıramy táýelsizdik jyldary ulysty uıystyra tústi.
Búginde ol úsh kún boıy toılanatyn elimizdegi eń úlken mereke.
Uly órkenıetimizden tamyr tartqan Ulystyń uly kúni aı men kúndeı, álemge birdeı adamzattyń ortaq qazynasyna aınaldy.
Byltyr Birikken ulttar uıymynyń Naýryzdy halyqaralyq mereke retinde qabyldaýy da sondyqtan.
Sondyqtan biz basty baılyǵymyz - berekeli birligimizdi kózdiń qarashyǵyndaı saqtaýymyz kerek.
Otanǵa degen shynaıy súıispenshilik - memlekettik sanany ornyqtyrady.
Eldik rýhy myqty halyqtyń baqyty qashanda baıandy bolady.
Sondyqtan osyndaı ıgi dástúrdi urpaq boıyna molynan sińirýge tıispiz.
Qabyrǵaly qalpyn, salıqaly saltyn saqtaǵan elimiz HHІ ǵasyrdyń alǵashqy on jyldyǵyn tolaıym tabyspen aıaqtady.
Tarıh úshin qysqa merzimde biz ulanǵaıyr ister atqardyq.
On jyl ishinde el ekonomıkasyn 12 esege ósirdik, irgeli el, joraly jurt qataryna qosyldyq.
Mádenı muramyzdy túgendep, ulttyq sanany nyǵaıttyq.
Qandastarymyzdy atamekenge jınadyq.
Abylaı aspas Arqanyń sary beline asqaq Astana qondyrdyq.
Baq qusy yntymaqty elge qonady, beıbit elde ǵana bereke bolady.
Biz Qazaqstan halqynyń yntymaǵyn saqtap, aınymas aýyzbirligimizdi bekemdeı tústik.
Bıyl barsha musylmannyń basyn qosatyn Islam konferentsııasy uıymyna tóraǵalyq etemiz.
Bul Eýropa tórinen tórelik aıtyp, aıtýly Astana Sammıtin ótkizgen elimizdiń rýhyn taǵy da asqaqtata túsedi.
Osynyń bári táýelsizdiktiń arqasynda júzege asýda.
Aldymyzda ulan asýlar, bıik belester tur.
Jańa onjyldyqtaǵy maqsatymyz - aıqyn, baǵdarymyz - anyq.
Biz bekitken 2020-shy jylǵa deıingi Damý strategııasy Qazaqstan halqyn jarqyn bolashaqqa bastaıdy.
Qymbatty qazaqstandyqtar!
Otandastar!
Halqymyz qashanda jańa jyldan jaqsylyq kútip, keler kúnnen úmitin úzbegen.
Búginin bolashaǵymen baılanystyryp, bar izgiliktiń bastaýyn ıgi nıetten izdegen.
Sondyqtan, tirshilik jańaratyn Naýryzda ár adam jaqsylyqqa nıet etýi tıis.
Dalasyndaı darhan halqymyz búginde Táńiri bergen tabıǵı jańa jylyn aıryqsha saltanatpen qarsy alady.
Alańdarǵa keń peıili men adal nıetin bildiretin aqboz úıler tigedi.
Endeshe, jańa jyldy izgi nıetpen qarsy alaıyq, aǵaıyn!
Áz-Naýryzdaǵy barsha tilekterińiz qabyl bolsyn!
Ár shańyraqqa Qydyr qonyp, baq darysyn!
Qoıan jyly bereke-birligimen kelsin!
Mereke qutty bolsyn!
Astana, 22 naýryz 2011 jyl.
