Din men dástúr úndestikte bolýy tıis
Din men dildiń, salt-sana men sharıǵı ǵuryptardyń ózara astasýy qazaq eliniń ózindik qoltańbasyn, qoǵamdyq kelisimniń myzǵymas modelin kórsetse kerek. Salt-dástúrdi de, ıslam dinin de ultty uıystyrýshy, tynyshtyq pen birliktiń faktory retinde qarastyrýǵa ábden bolady.
Memleket júrgizip otyrǵan dinı saıasat aıasynda din men dástúrdiń birligi máselesi de qarastyrylǵan.
Osy oraıda Almatyda 12 qyrkúıekte «Baısat» saýda ortalyǵynyń namazhanasynda qalalyq Qoǵamdyq damý basqarmasynyń qoldaýymen «Din men dástúr» jobasy aıasynda bazar jamaǵatymen kezdesý ótti. Sharaǵa 70-80 adam qatysty.
Bazar satýshylarymen áńgimeni dintanýshy, teolog, «Nur-Múbarak» Mysyr Islam mádenıeti ýnıversıtetiniń doktoranty Asyltaı Tasbolat júrgizdi.
Kezdesý kezinde dástúrli ıslam, terrorızmge qarsy is áreket, dinı ekstremızm men jat aǵymdarǵa qarsy kúres pen olardyń ýaǵyzyna aldanbaý máseleleri aıtyldy.
«Adyrna» ulttyq etnografııalyq birlestigi mundaı sharalardy tamyz aıynan beri ótkizip keledi.
Kezdesýler Almatydaǵy saýda ortalyqtarynyń namazhanalarynda, meshitterde, JOO-lar men kolledjderde ótkiziledi.
«Biz «Din men dástúr» jobasy aıasynda tarıh ǵylymdarynyń doktorlarymen, ǵalymdarmen, etnograftarmen, teologtarmen kezdesý ótkizemiz. Negizgi maqsatymyz - dinı ekstremızmniń aldyn alý, jastardyń, qala turǵyndarynyń jat aǵymdarǵa qarsy ımmýnıtetin kóterý. Bul adamdardyń ulttyq bolmysyna, túp-tamyryna, salt dástúrine, ádet-ǵurpyna, tarıhyna degen qurmetti oıatýǵa baǵyttalǵan. Osy baǵytta aldyn alý sharalaryn ótkizip turamyz», - dedi «Adyrna» ulttyq etnograf birlestiginiń tóraǵasy Arman Áýbákir.
Aıta ketý kerek, tamyz aıynan beri «Adyrna» birlestigi 8 kezdesý ótkizgen. Olardyń barysynda tarıhshy, teolog ǵalymdar men jamaǵat arasynda mańyzdy dıalog, ashyq áńgime órbıdi.
Jınalǵandar keıbir dástúrlerdiń sharıǵat qaǵıdalaryna qanshalyqty sáıkestigin surap jatady.
Onyń ishinde halqymyzdyń turmys-tirshiliginde saqtalǵan dinı dástúrler: súndetteý, neke qııý, Qurban aıt pen Oraza aıt, jarapazan, sadaqa, pitir taratyp, bata berý, táýiptik emdeý ádisi, tasattyq jasaý dinı joralǵylardyń ómirsheńdigin kórsetedi. Sondaı-aq mazarlar men keseneler, meshitter men medreseler halqymyzdyń tarıhynda ult rýhanııatynyń asyl qazynasy retinde qyzmet atqardy.
Qalalyq Qoǵamdyq damý basqarmasynyń atqaryp jatqan túsindirý jumystary osy bıik maqsat múddesinen shyǵyp otyr. Saıyp kelgende, Otan degen sózdiń astary belgili bir adamdar tobynyń ortaq dástúrmen, saltpen, qundylyqtarmen ómir súretin adamdar tobyn bildirse kerek.
«Islam dini tek qana nanym-senim aıasymen shektelmeı, sol dindegi elderdiń ómir saltyna, moraldyq-etıkalyq normalaryna, mádenı-rýhanı úrdisterine, dástúrine aınalyp otyr», - degen edi belgili ǵalym Aqseleý Seıdimbek.
Memleket basshysy Q.Toqaev Qazaqstan halqyna arnaǵan Joldaýynda: «Biz áleýmettik, etnostyq jáne dinı shıelenister men qaqtyǵystardy eńserýdiń jańa senimdi mehanızmderin jasaýymyz kerek. Dástúrli emes sektalar men kúmándi jalǵan dinı aǵymdardyń is áreketin qatań túrde tyıyp otyrý qajet. Qoǵamda, ásirese jastar arasynda dinı ekstremızm profılaktıkasyn kúsheıtýimiz kerek», – degen bolatyn.
