Din lıderleri sezine álemniń 50 elinen delegatsııa keledi

NUR-SULTAN. QazAqparat - Din lıderleri sezine álemniń 50 elinen delegatsııa keledi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Osy jylǵy 14-15 qyrkúıekte Dástúrli jáne álemdik dinder lıderleriniń VII sezin ótkizý josparlanyp otyr. Sezge álemniń 50 elinen 100-den astam delegatsııa, onyń ishinde ıslam, hrıstıan, býddızm, ıýdaızm, ındýızm, daosızm, zoroastrızm, sıntoızm, sondaı-aq saıası jáne qoǵam qaıratkerleri, halyqaralyq uıymdardyń ókilderi qatysady», - dedi Aıbek Smadııarov.

SІM ókiliniń atap ótýinshe, sezdiń taqyryby «Álemdik jáne dástúrli konfessııalar kóshbasshylarynyń pandemııadan keıingi kezeńde adamzattyń áleýmettik-rýhanı damýyndaǵy róli» retinde belgilendi. Onyń aıasynda dinderdiń rýhanı jáne adamgershilik qundylyqtardy nyǵaıtýdaǵy, bilim berý men dintanýdyń dinderdiń beıbit ómir súrýine yqpal etýdegi, ásirese dinı negizdegi ekstremızmge, radıkalızmge jáne terrorızmge qarsy is-qımyldaǵy róli jáne áıelderdiń qoǵamnyń ál-aýqaty men turaqty damýyna qosqan úlesi týraly máselelerdi qamtıtyn tórt sektsııalyq otyrys uıymdastyrylady.

«Aldaǵy dinı forýmnyń ereksheligi Rım Papasy Frantsısk, ál-Azhardyń Joǵarǵy ımamy Ahmed Mohammed Ahmed at-Taıeb, Ierýsalım Patrıarhy Teofıl III, Ashkenazdyń bas ravvıni Davıd Laý, Izraıldiń Bas sefard ravvıni Itshak Iosıf jáne basqa da dinı jetekshiler, sondaı-aq birqatar halyqaralyq uıymdardyń ókilderiniń qatysýy bolady. Bıylǵy jyly sezge qatysýshylardyń barynsha jaıly bolýy úshin ótetin orny Táýelsizdik saraıy belgilendi. Saraıdyń ornalasý orny qazaqstandyq, sondaı-aq sheteldik BAQ úshin keń baspasóz ortalyǵyn uıymdastyrýǵa múmkindik beredi. Búgingi tańda atalǵan is-sharaǵa 60 sheteldik BAQ-tyń 230-dan astam ókili akkredıtteldi. Sonymen qatar, VII Sezge, sondaı-aq Rım Papasynyń saparyna sheteldik jýrnalısterdi akkredıtteýdiń jabylǵany týraly habarlaımyz», - dedi ol.