Din kóshbasshylarynyń VIIІ sezi de Qazaqstanda ótetin boldy

NUR-SULTAN. QazAqparat – Elordada ótip jatqan Álemdik jáne dástúrli din kóshbasshylarynyń VII seziniń jabylý saltanatynda 2025 jylǵa josparlanǵan VIIІ sezdi de Qazaqstan astanasynda ótkizý týraly sheshim qabyldandy, dep habarlaıdy QazAqparat tilshisi.

«Biz Qazaqstan Respýblıkasyna Sezdi tamasha uıymdastyrǵany úshin, al Qazaqstan halqyna – meıirimdiligi men qonaqjaılylyǵy úshin alǵysymyzdy bildiremiz.

Biz Álemdik jáne dástúrli dinder lıderleri seziniń qyzmetin jalǵastyrýǵa ujymdyq múddeliligimizdi jáne kelesi VIII Sezdi 2025 jyly Qazaqstan Respýblıkasynyń astanasy Nur-Sultan qalasynda ótkizý nıetimizdi rastaımyz», - dep jazylǵan Deklaratsııa mátininde.

Deklaratsııanyń mátinin tanystyrǵan sezdegi Anglıkan shirkeýiniń arnaıy ókili, Dorkıng epıskopy Djo Beılı Ýellstiń aıtýynsha, Deklaratsııa búkil álemdegi bılikke, saıası kóshbasshylarǵa, din qaıratkerlerine, tıisti óńirlik jáne halyqaralyq uıymdarǵa, azamattyq qoǵam ınstıtýttaryna, dinı birlestikter men jetekshi sarapshylarǵa beriledi. Sondaı-aq BUU Bas Assambleıasynyń 77-shi sessııasynyń resmı qujaty retinde taratylady.