Din kóshbasshylary senim daǵdarysyn eńserýge úles qosýy tıis - QR Prezıdenti

ASTANA. QazAqparat - Din kóshbasshylary senimniń jahandyq daǵdarysyn eńserýge úles qosýlary tıis. Bul týraly búgin elordada ótip jatqan Álemdik jáne dástúrli dinder kóshbasshylarynyń VI sezinde QR Prezıdenti Nursultan Nazarbaev aıtty, dep habarlaıdy QazAqparat tilshisi.

QR Prezıdentiniń atap ótýinshe, búginde álem elderiniń negizgi kúsh-jigeri yntymaqtastyqqa emes básekelestikke baǵyttalyp otyr.

«Týrasyn aıtsaq, bul múldem qate, túıyqqa tireletin jol. Sondyqtan bizdiń ortaq paryzymyz - progress magıstraline oralýǵa járdem kórsetý. Bul jerde baıaýlaýǵa jol joq. Júzdegen myń, mılllıondaǵan adam týǵan jerlerin tastap ketýge májbúr, san jetpes kópshiligi iz-tússiz joǵalady. Ǵalamshardaǵy bosqyndar sany 65 mıllıonnan asyp jyǵyldy»,- dedi Elbasy.

Memleket basshysy jyl saıyn tabıǵı apattardyń saldarynan 4 mıllıon adam kedeıshiliktiń kebin kıse, mıllıondaǵan adam úılerin tastap ketýge májbúr bolatyndyǵyn basa aıtty. Tehnologııadyq damý qarqyndy júrip, jalpy álemdik baılyq arta túskenimen áleýmettik aýyrtpalyq aýqymy da ulǵaıa túskenin atap ótti.

«BUU málimetterine sáıkes jer shary turǵyndarynyń 14 paıyzy ashtyqta ómir súrýde. Jumyssyzdardyń jalpy sany 190 mıllıon adamnan asyp jyǵyldy. Bul kapıtalızmniń qunarly topyraǵy retinde áleýmettik teńsizdikti kúsheıtýde. Sondyqtan qaýipsizdik pen ádil álem basty másele sanalady. BUU Qaýipsizdik keńesiniń turaqty emes múshesi retinde onyń jumystaryna belsendi qatysa otyryp, Qazaqstan adamzattyń damýyna kedergi keltiretin jahandyq problemalardy sheshý úshin shuǵyl sharalar qabyldaý qajettigin anyq jáne ekiushty oısyz aıtty», - dedi Nursultan Nazarbaev.

Bul rette Elbasy álemdik qaýipsizdikke BUU Qaýipsizdik keńesiniń kúsh-jigerimen ǵana qol jetkizýge bolmaıtyndyǵyn basa atap ótti.

«Búginde barlyǵymyz, onyń ishinde osy zalda otyrǵan dinı jáne qoǵam qaıratkerleri, saıasatkerler senimniń jahandyq daǵdarysyn eńserýge óz úlesin qosýlary tıis», - dedi Memleket basshysy.