Din isteri mınıstrligi saqal, qysqa balaq jáne qara jamylǵy týraly pikir bildirdi

ASTANA. QazAqparat - QR Din isteri jáne azamattyq qoǵam mınıstrligi dinı sıpattaǵy syrtqy atrıbýtıkaǵa shekteýler men tyıymdardy engizý múmkindigin qarastyryp jatyr, dep habarlaıdy «QazAqparat» HAA tilshisi.

Mekeme ókilderiniń aıtýynsha, Qazaqstan qoǵamyn óz halqynyń rýhanı dástúri men ıslam dininiń baıybyna jetpeı jatyp, óz ata-analaryn  dinsiz dep aıyptaıtyn jastar alańdatyp otyr. Olardyń keıbiri sheteldik ýaǵyzshylardy tyńdap, halqymyzǵa tán emes dinı dástúrlerge boı ura bastady. Dál osyndaı azamattar syrtqy atrıbýtıkalarǵa erekshe mán beredi: jigitter saqal jiberip, balaqtaryn qysqartady, qyzdar qara jamylǵyǵa oranady.

"Qara jamylǵyǵa tyıym salý oramal men hıdjabqa tyıym salýdy kózdemeıdi. Bul tyıym salý men shekteý adamnyń bet-júzin anyqtaýǵa múmkindik bermeıtin kıim túrlerine (nıkab, chadra, paranja) qatysty. Munda bir ǵana atrıbýtty emes, teris aǵymnyń birneshe belgilerin aıtýǵa bolady. Biz bul máseleni zerttep jatyrmyz, zertteýden keıin ǵana sheshim qabyldanady», - dedi vıtse-mınıstr Berik Aryn Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, bul shekteýler men tyıymdar kez kelgen konfessııanyń dinı qyzmetkerlerine, shetel azamattaryna jáne medıtsınalyq sebeppen nemese qyzmettik qajettilikpen betperde kııýge májbúr adamdarǵa qatysty emes.