Din isteri agenttiginiń tóraǵasy Qazaqstandaǵy dinı birlestikterdiń qarjylyq qyzmetiniń aıqyndyǵyna kúmán keltirdi
ASTANA. 15 qarasha. QazAqparat - Dinı birlestikterdiń qarjy-sharýashylyq qyzmeti salasyn zań talaptaryna saı retke keltirý qajet.
Bul týraly búgin elordada ótip jatqan Qazaqstan din tanýshylarynyń ІІ Forýmynda QR Din isteri agenttiginiń tóraǵasy Qaırat Lama Sharıf aıtty.
Dinı jetekshiler adamgershiliktiń jáne joǵary maqsattarǵa qol jetkizý úshin shynaıy qyzmet etýdiń úlgisi bolýǵa tıis ekendigin basa aıtqan ol: «Biraq biz dinı birlestik ókilderiniń kúdikti, qylmystyq isterge qatysty bolǵanyn da bilemiz. Máselen, 2010 jyldyń qyrkúıeginde Almaty áýejaıynda «Blagodat» shirkeýiniń pastory Kım Sam Son tártip saqshylarynyń qolyna túsken. Tekserý kezinde odan deklaratsııalanbaǵan iri kólemde aqsha qarajaty tabyldy», - dedi.
Agenttik basshysynyń atap ótýinshe, atalǵan azamat el aýmaǵynan Ońtústik Koreıaǵa zańsyz túrde 130 myń AQSh dollaryn alyp shyqpaq bolǵan. Ol Almaty qalasyndaǵy Túrksib aýdandyq sotymen shartty túrde 2 jylǵa sottalyp, aqshasy tárkilendi.
«Basqa da dinı birlestikterdiń qarjylyq qyzmetiniń aıqyndyǵy kúmán týdyrady. Sondyqtan dinı birlestikterdiń qarjy-sharýashylyq qyzmeti salasyn zań talaptaryna saı retke keltirý qajet», - dedi Q.Lama Sharıf.
