Din isteri agenttiginiń, dinı basqarma men meshitterdiń basty jumysy - Ábý Hanıfa mázhaby arqyly dindi túsindirý

 Búgin Májiliste «Qazaqstan Respýblıkasy men Qasıetti Taq arasyndaǵy Ózara qatynastar týraly kelisimdi ratıfıkatsııalaý týraly» zań jobasyna oraı depýtattar saýalyna jaýap bergen QR Din isteri agenttiginiń tóraǵasy Qaırat Lama Sharıf osylaı málim etti.

Depýtattar saýalyna jaýap berý barysynda Din isteri agenttiginiń tóraǵasy elimizde bilim berý júıesi zaıyrly ekenin, sondyqtan da jasóspirimderdiń dindi túsinýi dintaný pánderi arqyly 9 synyptan bastap ótip, jastar odan ózine kerekti maǵlumattardy alatynyn aıtty. Budan bólek,  jastar óz bilimin din jolynda jetildirmek bolsa, elimizdegi 9 medrese men «Nur Múbárák» meshitiniń buǵan esigi aıqara ashyq ekenin atap ótti.

«Shyn máninde biz buǵan deıin jańa zańdy qabyldaǵanda onyń kirispesinde «Qazaqstanda Ábý Hanıfa mázhabyn taratamyz» dep basa aıttyq. Qazirgi basty maqsatymyz, sondaı-aq Din isteri agenttiginiń, dinı basqarma men meshitterdiń barlyq jumysy Ábý Hanıfa mázhabynyń arqasynda, ıaǵnı 12 ǵasyr boıy qazaq dalasynda dástúrli túrde tarap kelgen osy mázhab arqyly dindi túsindirý bolyp tabylady. Árıne, dinı basqarmadaǵy ımamdardyń biliktiligi barlyq óńirlerge jetińkiremeı otyr. Sol úshin arnaıy kýrstar uıymdastyryp jatyr. Aldaǵy ýaqytta dinı basqarma bul baǵytta arnaıy attestattaýdan ótkizýge ázir», - dedi Q. Lama Sharıf.

Onyń aıtýynsha, búgingi kúni elimizde 2 myń 300 meshitti qaıtadan tirkeý jumystary júrgizilip jatyr.  «Bul rette dinı basqarma óz sheshimimen moldasy joq aýyldaǵy bos meshitterdi toqtatý nemese olardy namazhanaǵa aınaldyrý týraly sheshim qabyldaýda. Bizdiń zańymyz boıynsha memleket din isterine aralaspaıdy. Degenmen, biz Qazaqstan musylmandary dinı basqarmasynyń osy úrdiske bizben birge atsalysyp jatqanyn quptaımyz», - dedi agenttik tóraǵasy.