Din isteri agenttiginiń aldynda turǵan basty másele - ultaralyq kelisim men dinaralyq tatýlyqty saqtaý - Memlekettik hatshy
ASTANA. 3 aqpan. QazAqparat /Qanat Mámetqazyuly/ - Din isteri agenttiginiń aldynda turǵan basty másele - ultaralyq kelisim men dinaralyq tatýlyqty saqtaý.
Búgin Din isteri agenttiginiń keńeıtilgen alqa májilisinde QR Memlekettik hatshysy Muhtar Qul-Muhammed osylaı málim etti.
«Adamzat damýynyń qaı kezeńi bolmasyn din máselesi kez kelgen qoǵamdaǵy, kez kelgen memlekettegi eń basty máseleniń biri bolyp tabylady. Bizdiń qoǵamda da dál osyndaı jaǵdaı oryn alyp otyr. Qazaqstannyń búgingi saıası turaqtylyǵy, ekonomıkalyq qarqyndy damýy, áleýmettik jaǵynan úlken jetistikterge jetýiniń barlyǵy táýelsizdik jyldarynda Elbasy ornyqtyrǵan ultaralyq kelisim men dinaralyq tatýlyqtyń negizinde júzege asyp otyr. Endeshe bizdiń eń basty qundylyǵymyz da osy. Sondyqtan da agenttik qyzmetkerleriniń aldynda turǵan eń basty másele de - Qazaqstan halqynyń basty qundylyǵyn odan ári ornyqtyrý, odan ári bekite túsý bolyp tabylady», - dedi M. Qul-Muhammed.
Onyń aıtýynsha, agenttiktiń atqaratyn jumysy asa kúrdeli, asa qıyn. Bul adamnyń kásibı biliktiligin ǵana emes, úlken ıntellektýaldy bilimdiligin de talap etedi. «Óıtkeni, adamzat tarıhyndaǵy kez kelgen qaqtyǵystar, órkenıetti damýdy basqa arnaǵa buryp jibergen mańyzdy oqıǵalardyń barlyǵy da osyndaı shetin jaǵdaıdan týyndaǵan», - dedi Memlekettik hatshy.
Sonymen qatar, byltyrǵy jylǵy el ómirinde oryn alǵan qıyndyqtarǵa toqtalǵan M. Qul-Muhammed, mezgilinde Elbasynyń jarlyǵymen qurylǵan agenttiktiń túrli oqıǵalardyń sebep-saldaryn taldap, ondaı keleńsiz jaıttardyń aldyn alýǵa qyzmet etýi tıistigine erekshe nazar aýdartty. Bul rette agenttik qyzmetkerleriniń atqaratyn jumystary da vedomstvo aıasymen shektelip qalmaýy shart.
