Din isteri agenttigi: Terrorızm men ekstremızmge uryný ata-ana tárbıesiniń joqtyǵynan

Búgin Májiliste QR Din isteri agenttiginiń qyzmetine arnalǵan Úkimet saǵatynda agenttik basshysy Qaırat Lama Sharıf osylaı málim etti.

«Eń aldymen balanyń aldynda ata-ananyń jaýapkershiligi zor, endeshe jastarymyzdyń terrorızm men ekstremızmge urynýy ata-analardyń tárbıesiniń joqtyǵynan. Úkimetti buǵan qatysty jazǵyra berýdiń qajeti shamaly. Shyndyǵynda, qazirgi jaǵdaıda keıbir ata-analar bala tárıbesin múldem qoıyp ketti. Meshitke baryp júrgenine qýanyp otyra bermeı, ne úshin baryp júrgenin, kimnen bilim alyp júrgenin, ustazy kim ekenin surap, qyzyǵýshylyq bildirip otyrsa, másele basqasha bolatyn edi», - dedi Q. Lama Sharıf.

Onyń aıtýynsha, Atyraý oblysynda terrorızmge qatysty sotty bolǵan jastardyń ata-analary da dál osy sekildi óz kinálaryn moıyndaǵan.

«Budan bólek, kópshilik ımamdardyń jumysy da durys deńgeıde dep aıta almaımyz. Aldyna kelgen jastardyń kótergen máselesine naqty, bultartpaı jaýap qatý bolsa ıgi edi. Meshitte bes ýaqyt namazdy ótkizip otyra berýge bolmaıdy. Jalpy, dindi bızneske aınaldyrǵan dúmsheler de joq emes», - dedi agenttik basshysy.

«Biz aldaǵy ýaqytta da jumysty jan-jaqty júrgizemiz. Konferentsııalar, jıyndar tek sóılep qalý, aıtyp ketý úshin ǵana jasalmaıdy. Ondaı basqosýlarda otandyq jáne sheteldik myqty ǵalymdardy tarta otyryp, teris aǵymǵa túsip ketken saqaldy, balaǵy sholaq jastarmen sóılese otyryp, olardy raıynan qaıtarý jumystaryn júrigizip jatyrmyz», - dedi ol.