Din isteri agenttigi salafıttik baǵyttaǵy ádebıetterge, aýdıo-vıdeo ónimderine eksperttik saraptamany kúsheıtýi kerek- Q. Minýarov
ASTANA. 22 qarasha. QazAqparat - Din isteri agenttigi tarapynan salafıttik baǵytyndaǵy ádebıetterge, aýdıo-vıdeo ónimderine degen eksperttik saraptamany kúsheıtý kerek. Búgin Parlament Májilisinde ótken konferentsııa barysynda sóz sóılegen «Áziret Sultan» meshitiniń naıb ımamy Qýat Minýarov osyndaı usynys aıtty.
«Ekinshiden, arab elderinde bilim alyp jatqan stýdent jastardy qadaǵalap, qajylyq paryz óteýshilerge de osy baǵytta durys túsindirý-semınar jumystaryn júrgizgen jón. Úshinshiden, Hanafıttik baǵytta oqyǵan bilimdi kadrlardy kóbeıtip, hanafıttiń júıemen jumys istep otyrǵan respýblıkamyzdaǵy barlyq meshit ımamdaryna keń qoldaý kórsete bilgen durys. Buǵan sebep, búgingi kúni destrýktıvti aǵym ókilderiniń bir bas suǵatyn jeri - meshitter, betpe-bet keletini -ımamdar. Ókinishtisi, olar meshitterde talas-tartys týǵyzyp, kóp jaǵdaıda ımamdarǵa baǵynbaıdy. Tipti qoqan-loqqy jasap, kúsh kórsetetinderi de joq emes. Bundaı ásire aǵym ókilderimen kúres nátıjeli bolý úshin birjaqty ǵana emes, jan-jaqty is-sharalar júzege asýy tıis. Sondyqtan destrýktıvti aǵym ókilderimen jumys júrgizýdiń qıyndyǵyna saı meshit qyzmetkerlerine de qajetti memlekettik qoldaý muqtajdyǵy týýda», - dedi Q. Minýarov.
Osy rette dintanýshy lańkestik pen dinı ekstremızmniń qaı túri de bizdiń qoǵamǵa jat ekenin, shynaıy musylman adam eshqashan lańkestikke barmaıtynyn, moınyna jazyqsyz adamdardyń qanyn júktemeıtinin alǵa tartty.
«Qazaq eli sýnnıttik ári hanafıttik mázhab negizinde, Matýrýdı aqıdasyna saı san ǵasyrlardan beri saltyn saqtap, dinin ustanyp kelgen. Táýelsizdiktiń tuǵyryn bekitip, bolashaqqa qadam basqan aldaǵy ýaqytta da elimiz saıası turaqtylyǵyn shaıqaltpaı, dinı kelisim jarastyǵyn quraǵan, álem qaýymdastyǵynyń aldynda bedeldi, beıbitsúıgish qalpynan tanbaq emes», - dedi Q. Minýarov.
