Din áskerden bólek bolýy tıis - S. Januzaqov
A. Qarashanyń 20-sy. QazAqparat /Qanat Mámetqazyuly/ ‑ Din áskerden bólek bolýy tıis. Búgin QR Qorǵanys mınıstrliginde ótken alqa májilisi barysynda jýrnalısterdiń saýalyna jaýap bergen Qorǵanys mınıstrligi Qurlyq áskeriniń bas qolbasshysy, general leıtenant Sáken Januzaqov osylaı málim etti,
dep habarlaıdy QazAqparat.
«Jalpy, zańnamalar men zańnamalyq aktiler jurtshylyq tarapynan saqtalynýy úshin qabyldanady. Sol sekildi qorǵanys salasyna keletin bolsaq, bunda boryshty óteýshi sarbaz eń aldymen áskerı jarǵyny basshylyqqa alady. Bul jarǵyda áskerı qyzmetkerdiń mindetteri men sharttary, tártipteri naqty kórsetilgen. Sondyqtan da, kez kelgen sarbaz óziniń áskerı boryshyn óteýi barysynda eshqandaı da qıǵashtyqqa jol bermeýi kerek, jaýyngerdiń, ofıtserdiń áskerı máseleden basqa jaǵdaılarǵa berilmeýi shart. Otan qorǵaý bul qasıetti azamattyq paryz. Osy paryzdy óteý úshin, sarbaz búkil táýlik boıy áskerı qyzmette, qaraýylda, polıgonda, kezekshilikte bolady, sporttyq sharalarǵa moıyn burady. Sol úshin, meniń oıymsha soldat bir jyl boıy óziniń el, Otan aldyndaǵy boryshyn adal atqarýy kerek. Armııada dinge degen basymdyq bolmaýy, din áskerden bólek bolýy tıis», dedi S. Januzaqov.
