Dımashtyń jankúıeri: Men buryn Qazaqstandy bilmeıtinmin
Áleýmettik jeliler arqyly Qytaıdyń ár qalasynan jınalyp Astanaǵa kelgen jankúıerler Dımash Qytaıdaǵy baıqaýǵa qatyspaı turyp, ózderiniń Qazaqstan týraly eshteńe bilmegendikterin aıtty.
«Joq. Men tek geografııa páninen Qazaqstannyń úlken memleket ekenin ǵana biletinmin. Dımashtyń ánin estip onyń ónerine erekshe tánti boldym. Ol talantty ánshi jáne qarapaıym halyqqa erekshe jaqyn. Basqa juldyzdar sııaqty eshqandaı ersi qylyq kórsetpeıdi. Onyń qarapaıymdylyǵy, jumsaq minezi meniń Qazaqstanǵa jáne qazaq halqyna degen qurmetimdi arttyrdy. Sondyqtan, osy kontsertke qoldaý bildirip, Dımashtyń týǵan elin, ósken jerin jáne turatyn qalasyn kórý týraly sheshim qabyldadym. Qazaqstan halqy da Dımash sııaqty óte aqkóńil, qonaqjaı eken»,- dedi Chansha qalasynan kelgen In ıÝchen atty jankúıer.
Sondaı-aq, qonaqtar Astana qalasy men osy aımaqtaǵy birneshe aýdandy jáne EKSPO aýmaǵyn aralap úlgergegen.
«Tunyq aýa, kórkem tabıǵat jáne qazaqtyń dámdi ulttyq taǵamy erekshe keremet áser qaldyrdy. Kontsertten keıin taǵy Almaty qalasyn serýendep qaıtýdy josparlap otyrmyz»-, dedi Ie Inın.
Aıta keteıik, «Bastaý» kontserti EKSPO-2017 halyqaralyq kórmesi aıasynda 27 maýsym kúni elordadaǵy «Astana Arena» stadıonynda ótedi.
Dımash Qudaıbergen kontsertke qatysatyn ánshilerdi kópshilikke jarııalaǵan bolatyn. Olar - Qytaıdyń belgili ánshisi Terrı Lın, Evrobaıqaý-2012 baıqaýynyń jeńimpazy Lorın (Shvetsııa), Ulybrıtanııa ánshisi Sofı Elıs Bekstor, Krıstına Orbakaıte (Reseı) jáne Qazaqstannyń eńbek sińirgen ártisi, opera ánshisi Maıra Muhamedqyzy.
