Dımashtyń turǵan úıi hostelge aınalýy múmkin

AQTÓBE. QazAqparat - Dımashtyń ákesi Qanat Aıtbaev áleýmettik jelide bolǵan tikeleı efırde karantınniń qalaı ótip jatqanyn aıtty, dep habarlaıdy QazAqparat tilshisi.

Oblystyq mádenıet basqarmasynyń basshysy Nurhan Kádirbaev áleýmettik jelidegi tikeleı efırde Dımashtyń ata-anasynan suqbat aldy. Qanat jáne Sveta Aıtbaevtar otbasymen qazir Nur - Sultan qalasynda turyp jatyr. Dımash ta demalysta.

«Osy jylǵa josparlaǵan sharýalarymyzdyń ýaqyty ózgerip jatyr. Bári rettelse júıeli is júıesin tabady dep esepteımiz. Ókinishke qaraı pandemııaǵa baılanysty Reseı, Eýropa elderinde kontsert berip, Japonııadaǵy festıvalge qatysý keıinge shegerildi. Alda ýaqyty naqtylanyp, Dımash óz tyńdarmandaryn qýantady dep oılaımyn», - dedi Qanat Aıtbaev.
Oblystyq mádenıet basqarmasynyń basshysy Nurhan Kádirbaev aıtýynsha, Dımash turǵan úı bolashaqta hostelge aınalady. Bul aqparatty Qanat Aıtbaev rastady.
«Ony bolashaqta kóre jatarmyz. Qazir ondaı oı bar», - dedi ol.
Aıta keteıik, ánshi Dımash Qudaıbergen qazir ata-anasynyń janynda, Qazaqstanda. Kitap oqyp, álemdik týyndylardy otbasymen tamashalap júr.
«Dımash tórt jyl boıy jumys istedi. Qazir ol demalystyń qyzyǵyn sezinip jatyr. Ol kóbine kitap oqıdy, fılm qaraıdy. Keıde rejısserlerdiń týyndysyn birge talqylaımyz. Búgin de álemdik kınoqordan bir týyndy tamashalap, talqylaýdy josparlap otyrmyz», - dedi Q. Aıtbaev.