Dımashtyń «Singer-2017» baıqaýyndaǵy jetistigine Qytaı Úkimetiniń qatysy joq - QHR elshisi

ASTANA. QazAqparat - Qazaqstandyq ánshi Dımash Qudaıbergenniń Qytaıdaǵy «Singer-2017» atty tanymal baǵdarlamaǵa qatysýy men Qytaı úkimetiniń arasynda eshqandaı baılanys joq. Bul týraly búgin BAQ ókilderiniń saýalyna jaýap bergen Qytaı Halyq Respýblıkasynyń Qazaqstandaǵy Tótenshe jáne ókiletti elshisi Chjan Hanhýeı aıtty, dep habarlaıdy QazAqparat.

«Jýyrda men Dımashpen kezdestim. Ol - óte symbatty jigit, Qazaqstannyń maqtanyshy. Árıne, ol úlken jetistikke jetti, Qytaıda kóptegen jankúıerleri bar. Ol óz erkimen qatysty, úkimettiń buǵan esh qatysy joq», - dep atap ótti elshi.

Elshiniń sózine qaraǵanda, qazaqstandyq ánshiniń jetistigi Qazaqstan men Qytaı halqynyń mádenıetin burynǵydan da jaqyndata túsýge septigin tıgizdi.

«Bul memlekettik baǵdarlama emes, biz oǵan Qazaqstannan kim qatysa alatynyn tańdaı almaımyz jáne kómektese almaımyz. Osynyń aldynda jelide bireýdiń Dımash Qytaıda úlken jetistikke jetýine Qytaı Úkimeti kómektesti, bul Qytaıdyń Qazaqstanǵa qarsy mádenı agressııasy dep jazǵanyn baıqap qaldym. Bul qandaı logıka? Keıde osyndaıdy oqyp qalamyn. Biraq muny qalaı túsindirýge bolatynyn bile almaı-aq qoıdym», - dedi Chjan Hanhýeı.

Budan tys, Chjan Hanhýeı taǵy BAQ ókilderiniń eki el qatynasy týraly birqatar suraqtaryna jaýap berdi.

«Jýyrda Qazaqstan Prezıdenti Nursultan Nazarbaev Qytaıdyń Beıjiń qalasynda ótken «Bir beldeý - bir jol» forýmyna qatysty. Qytaı úshin Nazarbaevtyń bul forýmǵa qatysýy úlken mańyzǵa ıe. Atalmysh forým aıasynda Qazaqstan Prezıdenti QHR tóraǵasy Sı Tszınpın jáne QHR Memlekettik keńesiniń Premeri Lı Ketsıanmen kezdesti», - dep atap ótti Chjan Hanhýeı.

Chjan Hanhýeı myrzanyń aıtýynsha, Qytaı eki eldiń «Jibek joly» jáne «Nurly jol» baǵdarlamalary aıasyndaǵy yntymaqtastyǵyn joǵary baǵalaıdy. Qazaqstan - Qytaı úshin tek ekonomıka salasynda ǵana emes, sonymen qatar saıası saladaǵy mańyzdy seriktesi.

Elshiniń aıtýynsha, 7-9 maýsym aralyǵynda, ıaǵnı EKSPO kórmesi aıasynda, Astanada Shanhaı Yntymaqtastyq Uıymy sammıti ótedi. Samıtti ótkizýge qatysty daıyndyq jumystary qazir oıdaǵydaı júrgizilip jatyr.

Aıta keterligi, kezdesýge birqatar qazaqstandyq BAQ ókilderi jáne Qytaıdyń aqparat agenttigi,  Sınhýa agenttiginiń jýrnalısteri qatysty.