Dımashtyń ónerine degen súıispenshilik bizdi biriktirdi - fan-klýb ákimshisi

Qazaqstan ánshisiniń jankúıerleri úshin bul jolǵy basqosýdyń orny tipten erekshe. Pandemııa kezinde ýaqytsha toqtatylǵan «ARNAU» týry qaıta jalǵanyp, fan-klýb músheleri bir-birimen kezdesý múmkindigine ıe boldy.

Sharany Dimash Multicultural Club ákimshisi Anna Lıýdvıg pen Dimash Fanclub Deutschland ókili Bettına Drevensek uıymdastyrǵan. Olar 70 elden jınalǵan 150-den astam jankúıerdiń kópten kútken kontsert aldynda osylaı kezdesýine qoldaý bildirgen Qazaqstannyń Germanııadaǵy Elshiligine rızashylyqtaryn jetkizdi.

«Eń aldymen, Qazaqstan Elshiligine alǵys aıtamyz. 2 jyldan keıin barshamyzdyń osylaı kezdesýimizge múmkindik týǵanyna óte qýanyshtymyz. «We Are One« (»Biz birgemiz« - red.) - jaı sóz emes. Dears (qymbatty jankúıerler - red.) mádenıeti, tili men mentalıtetindegi aıyrmashylyqtarǵa qaramastan, bir-birin únemi qoldaıdy, jaqsy kóredi. Sebebi, bizdiń barlyǵymyzdy Dımashtyń shyǵarmashylyǵyna degen súıispenshilik biriktirdi», - deıdi ánshiniń mýltımádenı fan-klýbynyń ákimshisi Anna Lıýdvıg.

Elshilik ókilderi Dımashtyń shyǵarmashylyǵyna tánti jandarǵa ánshiniń týǵan eli, onyń mádenıeti men salt-dástúrleri jaıly aıtyp berdi. Sondaı-aq, Qazaqstannyń tabıǵaty men aıshyqty jerlerin tanystyratyn kórme usynyldy.

Eske sala keteıik, Germanııanyń Dıýsseldorf qalasynda Dımashtyń jeke kontserti ótetini habarlanǵan bolatyn.