Dımashtyń Nıý-Iorktegi kontserti: Amerıkalyqtar alǵan áserimen bólisti

NUR-SULTAN. QazAqparat – He makes me cry. - This is amazing! - Splendid! -Unbelievably, I am very impressed. - Excellent! Keremet! Tamasha! Tańqalarlyq! Ǵajap! Teńdesi joq! Dımashtyń AQSh-taǵy jeke shyǵarmashylyq keshine barǵan kórermender alǵan áserimen osylaı bólisti, dep habarlaıdy Habar 24.

AQSh turǵyndary ony «án shyrqaıtyn sensatsııa» dep ataıdy. Rasynda da jer júzinde sırek kezdesetin daýys keńdigi 6 oktavany quraıdy. Dımash zamanaýı týyndylardy oryndaǵanda klassıkalyq mýzyka mánerin qosady jáne dástúrli qazaq ánderin búkil álemge tanytty.

Djýlı Kıssıs, Ogaıo shtatynyń turǵyny:

- Dımash - búkil álemde teńdesi joq dara tulǵa. Ol maǵan aýrýlarǵa tózip, ýaıymnan aıyrylýǵa kómektesedi. Men úshin onyń orny bólek. Men AQSh-taǵy Dımashtyń Feısbýktegi fan-klýbynyń moderatorymyn.

Dıana Herd, Lýızıana shtatynyń turǵyny:

- Ol túgel ómirimdi ózgertti. Jasym alpys altyda. Ómirimde alǵash ret fan-klýbqa kirdim. Dımash óziniń tereń ónerimen adamdarǵa úmit beredi. Mıllıondaǵan ánshi tyńdaǵanmyn, biraq eshqaısysy Dımashqa uqsamaıdy. Endi Dımashtyń otany - Qazaqstanǵa barýdy armandap júrmin.

Dımash Nııazov, Nıý-Iork polıtsııasynyń qyzmetkeri:

-Kesh tamasha ótti, umytylmas áser qaldyrdy. Munda kóp adam keldi, bárimiz ony jaqsy kóremiz. Kontsertke jubaıym Djenıfermen birge keldim. Onyń súıikti áni - «Screaming».

Djenıfer, Nıý-Iork turǵyny:

- Maǵan Dımash daýysy men energetıkasy óte unaıdy. Kontsert barysynda Dımash halyqpen de aralasýǵa úlgerdi. Kórermender sezimderin jasyrmaı, ánderin qosylyp aıtty. Osy shoýdy qoıýǵa kásibı horeograftar, qazaqstandyq bıshiler men mýzykanttar, operatorlar men stılıster qatysty.

Svetlana, Fıladelfııa turǵyny:

- «Maǵan «Mahabbat ber maǵan» qazaq áni unaıdy. Dımashtyń oń energetıkasy bar. Ózi halyqqa ashyq bolǵandyqtan, biz de júregimizdi ashyp, oǵan umtyldyq.

Hanaeı, Nıý-Iork turǵyny:

-«Dımash – tańqalarlyq ánshi. Men jaqynda ǵana onyń otanyna, Qazaqstanǵa baryp keldim. Keremet el!

Gúljamal Jandalınova, fan-klýb ókili:

- Onyń ánderi adamdy emdeıdi. Men Dımash Qudaıbergenniń halyqaralyq fan-klýbyna kiremin. Sonda biz onyń mýzykasynyń shıpalyq áseri týraly túrli áńgime estip júrmiz. Qazaqstandyq shoý kórermenderdiń tańdaıyn qaqtyrdy. Bul keshke álemniń ár túkpirinen kelgen Dımashtyń myńdaǵan jankúıeri úshin naǵyz meıram boldy.

Kentýkkı shtatynyń 70 jastaǵy turǵyny Maıkl Garrett ataqty ánshimizdi qazaq halqynyń súıikti uly dep atady. Kontsertke bıletti qyrkúıek aıynda satyp alǵan aqsaqal Dımashqa syıǵa tartý úshin óz qolymen qobdısha jasapty.

Aıta ketsek, buǵan deıin habarlaǵanymyzdaı Dımash Qudaıbergenniń Nıý-Iorktegi kontserti anshlagpen ótti . Onda Dımash «Daıdıdaý» ánin oryndaǵan sátte kórermen oryndarynan turyp, birge shyrqady.

Foto: dimashnews.com