Dımashtyń kontsertinde kıkiljiń shyǵarǵan kúzetshiler qyzmetterinen ketti
Muhamedıuly aldymen kontsert bergen Dımash Qudaıbergenge úlken rızashylyǵyn bildirdi.
«Dostarym, keshe Astanada ótken saltanatty keshte Qytaıdyń bedeldi «I am a singer» jobasynda jasyndaı jarqyldaǵan talantty ánshimiz Dımash Qudaıbergenge úlken qurmet kórsettik. Biz Dımashty jaqsy kóretin jáne ony súıip tyńdaıtyn tyńdarmandary úshin «Qazaqstan» kontserttik zalyna tegin kirýge múmkindik berdik jáne nıet tanytqan barlyq jurtty kontsertti tamashalaýǵa shaqyrdyq. Dımash Qudaıbergen keshe keremet kontsert ótkizip berip, ata-anasymen án shyrqady, óz jeńisin atasy men apasyna arnady. Dımashty kórýge kelgen, ony qoldap, qoshamettegen barlyq adamdarǵa alǵysymdy aıtamyn. Tyǵyz grafıkke, alys jolǵa qaramastan, Qytaıdan kele sala, Qytaıda qoldaý kórsetken tyńdarmandaryna syı-qurmet retinde, eń alǵashqy kontsertin Astanada ótkizýge kelisimin bergenine Dımashqa arnaıy rızashylyǵymyzdy bildiremiz!», - dep atap ótti ol.
«Oryn alǵan oqıǵaǵa keletin bolsaq. Óte ókinishti jaǵdaı boldy. Eshkim de azamattardyń, sonyń ishinde jýrnalısterdiń is-áreket erkindigin shekteýge quqyq joq. Qaýipsizdik qyzmetiniń mundaı qylyǵy árıne josyqsyz. Tańerteń men qaqtyǵys qatysýshylaryna qatysty qatań shara qoldanýdy buıyrdym jáne «Qazaqstan» ortalyq kontsert zalynyń basshylyǵy atalǵan qaýipsizdik qyzmetiniń ókilderi jumystan qýylǵanyn habarlady. Sóz joq, bul EXPO-2017 kórmesiniń qarsańynda mańyzdy qorytyndy shyǵarýymyzǵa túrtki boldy. Uıymdastyrý jaǵynan biz endi mundaı oqıǵalardyń endi oryn almaýy úshin qajetti sharalardy kúsheıtemiz. Al Dımashtyń kontsertin uıymdastyrý kezinde budan bylaı syıymdyraq alańdardy tańdaıtyn bolamyz», - dedi mınıstr.
