Dımashtyń kontserti alǵash ret Kýba telearnasynan kórsetildi
Kýbalyqtar álemge tanymal qazaq ánshisiniń ónerin «Canal Clave» telearnasynan tamashalady. Bir saǵattyq baǵdarlama barysynda Dımashtyń 2019 jyldyń naýryzynda Reseıdiń Máskeý qalasynda anshlagpen ótken «D-Dynasty» atty jeke kontsertiniń jazbasy kórsetildi.
Kýbalyq «Canal Clave» telearnasy efırge 2013 jyly shyǵa bastady. Telearna mýzykalyq baǵytty ustanǵan. Kýbalyq jáne álemdik deńgeıdegi ánshilerdiń beınebaıandaryn, ánderin, kontsertterin jáne óner adamdary týraly derekti fılmderdi translıatsııalaıdy.Táýligine 15 saǵat efırge shyǵatyn telearnanyń qazir túrli 22 baǵdarlamasy bar.
Dımashtyń kýbalyq jankúıerleri «Canal Clave» telearnasynyń resmı paraqshalaryna birneshe aı boıy hat joldap, onyń ónerin ekrannan kórsetýdi suraǵan. Nátıjesinde ótinish oryndalyp, kýbalyq telearnadan qazaqstandyq talanttyń kontserti berildi.
«Dimash Cuba Dears» 2019 jyldyń qarasha aıynda qurylǵan. Sodan beri kýbalyq fanattar D.Qudaıbergenniń shyǵarmalaryn nasıhattaýdy qolǵa alǵan. Ásirese buqaralyq aqparat quraldary arqyly óz elderinde nasıhattap keledi.
Aıta keteıik, bıyl mamyr aıynda Dımashtyń kontserti alǵash ret «Cubavisión» telearnasynda kórsetilgennen keıin, jergilikti ózge telearnalar, radıostantsııalar óz efırleri men jelileri arqyly qazaqstandyq ánshiniń kontsertterin translıatsııalaýǵa qyzyǵýshylyq bildire bastady. Bul – Dımashtyń kýbalyq Dears-tarynyń eńbegi. Olardyń usynysymen 23 tamyzda «Radio Progreso» tanymal radıostantsııasy altyn daýys ıesiniń kontsertin efırge shyǵaryp, eń úzdik baǵdarlamalar reıtıngi boıynsha ekinshi oryndy ıelendi.
