Dımashtyń kanadalyq jankúıerleri qaıyrymdylyq sharasyn uıymdastyrdy

NUR-SULTAN. QazAqparat – Dımash Qudaıbergenniń kanadalyq jankúıerleri balalarǵa psıhologııalyq kómek kórsetetin Kids Help Phone qaıyrymdylyq uıymyna qarajat jınap berdi, dep habarlaıdy QazAqparat dimashnews-ke silteme jasap.

«Bizdi Dımashtyń jastardy únemi qoldap, kómektesip júretindigi yntalandyrdy», – deıdi jankúıerler.

Olar qaıyrymdylyq sharasyn ánshiniń týǵan kúni qarsańynda qolǵa alǵan. Osylaısha, 1 000 dollar (shamamen 440 130 teńge) jınady.

«Qazirgi ýaqytta jastar COVID-19 pandemııasynyń saldarymen kúresip jatyr jáne bizdiń senim telefonymyzǵa jıi júginedi. 2019 jylmen salystyrǵanda qońyraýlar sany 137 paıyzǵa artty. Sondyqtan, biz Dears-tiń bul kómegi úshin óte rızamyz. Biz Kanadadaǵy birde-bir bala qıyn ýaqytta jalǵyz qalmaıtynyna kepildik beremiz. Sizdiń kómegińiz balalardyń ómirin saqtaıdy!» - dep alǵys bildirdi Kids Help Phone komandasy qazaq ánshisiniń jankúıerlerine.

Aıta keteıik, Kids Help Phone – Kanadadaǵy jalǵyz qaıyrymdylyq uıymy. Ol el jastaryna qupııa psıhologııalyq kómek kórsetedi. Uıym aǵylshyn jáne frantsýz tilderinde, aptasyna jeti kún, táýlik boıy jumys isteıdi. Ótken jyly uıym Kanadanyń túkpir-túkpirindegi 5 mln astam balaǵa keńes bergen.