Dımashtyń kanadalyq jankúıerleri qaıyrymdylyq aktsııasyn uıymdastyrdy

ASTANA. QazAqparat - Dımash Qudaıbergenniń kanadalyq jankúıerleri aýyr dertke shaldyqqan balalarǵa kómektesetin Make a Wish Canada qaıyrymdylyq qoryna qarajat jınaý sharasyn uıymdastyrdy, dep habarlaıdy QazAqparat.

Dimashnews.com saıtynyń jazýynsha, qaıyrymdylyq aktsııasyn qazaqstandyq ártistiń týǵan kúnine oraı Dears from the Canada & Dimash fan-klýby ótkizdi.

Make a Wish Canada — ómirine qaýip tóndiretin aýrýlary bar balalardyń tilekterin oryndaýǵa arnalǵan kanadalyq ulttyq qaıyrymdylyq uıym.

1983 jyly negizi qalanǵan ýaqyttan beri Make a Wish Canada 37 000-nan astam balanyń armanyn oryndady.

«Dımashtyń balalarǵa kómektesýge degen nıetinen shabyttanǵan eldiń túkpir-túkpirinen kelgen Dears qaıyrymdylyq kómekke úlken qýanyshpen úles qosty. Osylaısha, biz 1070 kanadalyq dollardy (360 myń teńge) jınaı aldyq. Biz odan da kóp balalar óz armandaryn oryndaı alady dep úmittenemiz, óıtkeni úmit - saýyǵyp ketýdiń kepili», - dep bólisti Kanada men Dımash fan-klýbynyń Dears jankúıerleri.