Dımashtyń izbasary Astana Operada óner kórsetedi
ASTANA. QazAqparat - 21 aqpan kúni «Astana Opera» teatry Karl Orftyń ataqty «Karmına Býrana» kantatasynyń teatrlandyrylǵan nusqasyn qoıady, dep habarlaıdy QazAqparat.
Onda teatrdyń tenor partııasyndaǵy eń jas ártisi - «Astana Opera» balalar stýdııasynyń solısi Qajymurat Erkin alǵash ret sahna tórine shyǵady.
«On jasar Qajymurat qoıylymǵa tolyqqandy jeke nómirimen solıst retinde qatysady. Jas ártis buryn Dj.Pýchchınıdiń «Toska» operasynda Baqtashy bala rólin, «Bogema» operasynda solony oryndaǵan, aǵa býyn áriptesterimen birge túrli kontserttik baǵdarlamalarǵa qatysqan. Qazirdiń ózinde Qajymurat Erkin joǵary kásibıligin, ártistigin, aıryqsha mýzykalyq qabiletteri men zor áleýetin kórsetýde», - dep jazdy teatrdyń baspasóz qyzmeti.
Rejısser Natalıa Kagadııdiń aıtýynsha, Qajymurat Erkin kúrdeli vokaldyq partııany keremet ıgerip qana qoımaı, jańa sahnalyq beıneni de alyp shyǵýy tıis. Mundaı tájirıbe ómirde buryn-sońdy bolmaǵan, ıaǵnı tenorǵa arnap jazylǵan róldi bala daýsy oryndamaǵan.
K. Orftyń eń tanymal shyǵarmasy «Astana Opera» sahnasynda sımfonııalyq orkestr, hor, balalar hory men opera trýppasy jetekshi solısteriniń oryndaýynda shyrqalady. Soprano partııasyn Bashqurtstannyń eńbek sińirgen ártisi Alfııa Karımova, barıton - halyqaralyq baıqaýlardyń laýreaty Talǵat Ǵaleev usynady. Dırıjer - Qazaqstannyń eńbek sińirgen qaıratkeri Abzal Muhıtdınov, bas hormeıster - Qazaqstannyń eńbek sińirgen qaıratkeri Erjan Dáýitov, rejısser - Natalıa Kagadıı, balalar stýdııasynyń jetekshisi - Altynǵanym Ahmetova.
«Bul ádettegi spektakl emes, munda mýzyka, sóz, beıneqatar ózara úılesim tapqan, sahnanyń biregeı tehnıkalyq múmkindikteri qoldanylǵan. Tyńdarman qaýymǵa taǵdyrdyń taýqymeti, Fortýna dóńgeleginiń máńgilik qozǵalysy men bastapqy núktesine qaıta oralýy, adam ómiriniń sharasyzdyq sheńberi týraly ósıet áńgime usynylady. Aıtylǵan oqıǵa kórermenderge ómirdiń mánin jańasha túsinýge shabyttandyrady, - dep óz sózin túıindedi Natalıa Kagadıı.
