Dımashtyń daýysy Antarktıdaǵa jetti

ASTANA. QazAqparat – Ánshi Dımash Qudaıbergen men onyń jankúıerlerine arnalǵan La Era Dimash radıostantsııasy Antarktıdada habar tarata bastady. Bul týraly «Esperanza» ǵylymı-zertteý stantsııasynyń qyzmetkerleri málim etken, dep habarlaıdy QazAqparat dimashnews.com saıtyna silteme jasap.

«Esperanza» – shamamen Antarktıka túbeginiń qıyr soltústiginde ornalasqan argentınalyq zertteý stantsııasy. Stantsııadan habar taratatyn LRA36 radıosynyń qyzmetkerleri La Era Dimash júrgizýshilerine suhbat beredi. Áńgime barysynda Klaýdııa Albarrasın, Marııa Evgenııa Rodrıges, Romına Zabalza jáne Marıela Chýrkına alys jáne sýyq kontınenttegi ózderiniń qıyn, biraq óte qyzyqty jumystary týraly aıtady. Sondaı-aq, La Era Dimash Antarktıdaǵa jetkenin jáne qyzdar qazaqstandyq ártistiń ánderin tyńdaýǵa múmkindik alǵanyn rastaıdy.

«Dımashtyń daýysyn alǵash estigende, biz shynymen tań qaldyq. Onyń ádemi ánderi bar, óte zor talant!» - dep oı bólisedi.

La Era Dimash radıosy negizin qalaýshylardyń oıy da osy bolǵan. Olar Argentınada óz radıosyn iske qosqan kezde qazaqstandyq ártistiń daýysy jer sharynyń ár túkpirinde estilýin qalady.

«Radıostantsııa alǵash ret efırge shyqqanda biz ózimizdi óte baqytty sezindik. Kún saıyn La Era Dimash radıosyn tyńdaıtyn elderdiń tizimi kóbeıip keledi. Olardyń arasynda biz buryn estimegen elder de bar. Mine, arada eki jyl ótkende bizdiń radıo 96 elde habar taratady», - deıdi radıostantsııanyń basshysy Paola Profeta.

Foto: dimashnews.com