Dımashtyń Astanadaǵy kontsertinde álemdik shoýlardaǵy tehnologııalar paıdalanylady
«Ádette, biz úlken sharalardy josparlasaq, ýaqyt taqaǵan kezde jarııalap, uıymdastyryp jatamyz. Biraq, bul joly arnaıy uzaq merzimdi daıyndyqty alyp, tyrysyp jatyrmyz. Bizde talqylaýdyń ózi bir-eki aı merzimdi aldy. Sondyqtan, bul jolǵy kontsertke úlken daıyndyqpen kelgimiz keledi. Qazir birneshe shyǵarmashylyq toppen jumys istep, ártúrli usynystardy qabyldap jatyrmyz. Múmkindiginshe, bul kontsertte álemdegi shoý-kontsertterde qoldanylatyn túrli tásilder men jańa tehnologııalardy paıdalanamyz. Sebebi, Astanada ótkiziletin kontsert - eń aldymen Dımashtyń óz halqyna, óz tyńdaýshylaryna arnalmaq», - dedi Erlan Qarın OKQ-da ótken baspasóz máslıhatynda.
Erlan Qarın óz sózinde, bul kontsertke shetelden óte kóp qonaq keledi dep kútilip otyrǵanyn aıtyp ótti.
«Ózderińiz biletindeı, Dımash álemge áıgili tanymal juldyz bolǵannan keıin ánshiniń kóptegen elde fanattary bar. Bizdiń mysaly búgingi máslıhatyn uıymdastyryp otyrǵanymyzdyń taǵy bir sebebi - osy ýaqytqa deıin qaıta-qaıta suraqtar kelip túsken bolatyn. Eldegi Dımashtyń qoldaýshylarmen birge shetelde turatyn azamattardan «Kontsert qaı kezde bolady? Biz aldyn ala josparlasaq deımiz. Alatyn bıletterdi alyp, qamdanýymyz kerek» degen syńaıdaǵy myńdaǵan suraq kelip, qaıta-qaıta túskennen keıin Dımashtyń kontserti týraly jarııaly habarlaý kerek dep sheshtik», - dedi Erlan Qarın.
Eske sala ketsek, buǵan deıin OKQ-da ótken baspasóz máslıhatynda Dımash Qudaıbergen Jastar jyly aıasynda Astanada kontsert beretinin habarlaǵan bolatynbyz.
